Ingibjörg R. Magnúsdóttir látin
Ingibjörg R. Magnúsdóttir, fyrrum skrifstofustjóri í Heilbrigðisráðuneytinu og bæjarfulltrúi Sjálfstæðisflokksins á Akureyri, lést 20. janúar sl. 98 ára að aldri og verður jarðsungin í dag frá Hallgrímskirkju. Ingibjörg var fyrst kvenna kjörin í bæjarstjórn Akureyrar fyrir Sjálfstæðisflokkinn og sat þar á árunum 1966-1971.
Kynningarmynd af Ingibjörgu úr kosningabaráttunni 1970
Ingibjörg Ragnheiður Magnúsdóttir fæddist 23. júní 1923 á Akureyri og ólst þar upp. Foreldrar hennar voru hjónin Magnús Pétursson, kennari á Akureyri, og Guðrún Bjarnadóttir, húsfreyja. Ingibjörg átti fimm bræður; Sverri Hermann, Harald Braga, Bjarna Viðar, Ragnar Magna og Gunnar Víði. Gunnar er einn eftirlifandi af systkinunum.
Ingibjörg lauk gagnfræðaprófi frá MA og íþróttakennaranámi frá Íþróttaskóla Björns Jakobssonar á Laugarvatni 1943. Hún lauk síðan húsmæðraskólanámi í Uppsölum í Svíþjóð 1948. Þá lauk hún prófi frá Hjúkrunarskóla Íslands 1961 og stundaði síðan framhaldsnám í hjúkrunarkennslu og spítalastjórn við Sygeplejeskolen í Árósum 1964-65. Síðar lauk hún stúdentsprófi við öldungadeild MH.
Ingibjörg kenndi fimleika á Siglufirði og í Reykjavík, sund á Suðureyri, í Miðfirði og víðar. Hún tók síðan við stöðu hjúkrunarforstjóra við Fjórðungssjúkrahúsið á Akureyri þegar hún útskrifaðist úr hjúkrunarfræðináminu og var þar í tíu ár. Hún kom á fót fyrsta sjúkraliðanámi hér á landi og brautskráði fyrstu sjúkraliðana vorið 1966 og fann raunar upp þetta nafn, sjúkraliði.
Ingibjörg sker sig óneitanlega úr á myndinni enda eina konan í hópi átta efstu frambjóðenda Sjálfstæðisflokksins á Akureyri 1966
Ingibjörg var kjörin fyrst kvenna fyrir Sjálfstæðisflokkinn í bæjarstjórn Akureyrar og átti þar sæti í fimm ár 1966-1971 og var í ýmsum nefndum á vegum bæjarins á þeim tíma, lengst af í félagsmálaráði. Ingibjörg flutti frá Akureyri 1971 þegar hún hvarf á vit krefjandi verkefna sunnan heiða þegar hún hóf störf í heilbrigðis- og tryggingamálaráðuneytinu. Ingibjörg lauk starfsferlinum í ráðuneytinu sem skrifstofustjóri þess á árunum 1989-1993. Hún sat í fjölda nefnda, m.a. á vegum ráðuneytisins, og gegndi formannsstörfum í mörgum þeirra, s.s. hjúkrunarráði, ljósmæðraráði, byggingarnefnd heilsugæslustöðva í Reykjavík, stjórn Röntgentækniskólans og sjúkrahúsnefnd.
Grein eftir Ingibjörgu í Íslendingi-Ísafold í kosningabaráttunni 1970
Ingibjörg var einn af brautryðjendum námsbrautar í hjúkrunarfræði við Háskóla Íslands, sat í stjórn námsbrautarinnar 1973-90 og gegndi stöðu námsbrautarstjóra 1975-90. Hún gegndi trúnaðarstörfum, m.a. fyrir Zontaklúbbana á Íslandi. Hún var sæmd riddarakrossi hinnar íslensku fálkaorðu á nýársdag 1988. Enn fremur var Ingibjörg heiðursfélagi Félags háskólamenntaðra hjúkrunarfræðinga og Hjúkrunarfélags Íslands. Þá skrifaði Ingibjörg einnig töluvert í blöð og tímarit um heilbrigðismál, enda hafsjór af fróðleik um málaflokkinn og mikilvirk þegar kom að álitsgjöf um hann.
2007 hafði Ingibjörg forgöngu að stofnun Rannsóknarsjóðs Ingibjargar R. Magnúsdóttur og heyrir sjóðurinn undir styrktarsjóði Háskóla Íslands. Sjóðurinn hefur um margra ára skeið styrkt doktorsnema í hjúkrunar- og ljósmóðurfræðum til rannsóknastarfs.
-----
Auglýsing á Ingibjörgu úr baráttunni 1966 og bent á sögulegt mikilvægi þess að hún nái kjöri
Ingibjörg R. Magnúsdóttir markaði söguleg skref sem fyrsta konan sem kjörin var sem aðalfulltrúi í bæjarstjórn Akureyrar fyrir hönd Sjálfstæðisflokksins. Hún markaði reyndar söguleg skref hvarvetna sem hún lagði hönd á plóg, í málefnum hjúkrunar í senn sem stjórnandi og brautryðjandi í kennslu um fagið, eins og sjá má af ofangreindri umfjöllun um ævi hennar og störf.
Sjálfstæðismenn á Akureyri minnast Ingibjargar og framlags hennar til stjórnmála og fræðigreina, sem hún vann svo ötullega að, með virðingu og þökk og votta fjölskyldu hennar samúð nú þegar hún kveður eftir langa og merka ævi. Blessuð sé minning hennar.
Stefán Friðrik Stefánsson
ritstjóri Íslendings
