Velferðarmál

Öflug velferð fyrir betri lífsgæði á öllum æviskeiðum

Tryggjum fjölbreyttar húsnæðislausnir, aukið valfrelsi og sterka velferðarþjónustu með heilsueflingu, lífsgæðakjarna og félagsaðstöðu í forgangi fyrir eldri borgara

• Við ætlum að styðja við uppbyggingu lífsgæðakjarna fyrir eldri borgara og setja kraft í uppbyggingu á íbúðarhúsnæði fyrir ört stækkandi hóp eldri borgara til að tryggja fjölbreytt val og sjálfstæða búsetu sem lengst.

• Við höldum áfram að styðja við heilsueflingu og virkni eldri borgara með uppbyggingu íþróttamannvirkja, lýðheilsukorti og lýðheilsustyrk fyrir eldri borgara. Við ætlum að tryggja að verkefnið Virk efri ár haldi áfram ásamt því að gera þjónustuna gjaldfrjálsa. 

• Við ætlum að halda áfram að tryggja öfluga þjónustu við fatlað fólk með frekari uppbyggingu íbúðalausna og þjónustu.

• Við ætlum að fjölga bílastæðum við heilsugæsluna í Sunnuhlíð.

• Við ætlum að tryggja hóflega gjaldtöku fyrir þjónustu bæjarins t.d. er varðar heimsendan mat, mat og kaffi í þjónustumiðstöðvum bæjarins og vegna heimaþjónustu.

Virk og sjálfstæð efri ár

Öflugt velferðarkerfi byggir á virðingu fyrir fjölbreyttum þörfum íbúa og skýru markmiði um að styðja fólk til sjálfstæðis og virkni. Við viljum að Akureyri sé samfélag þar sem eldri borgarar hafa raunhæft val um búsetu, góða þjónustu og tækifæri til að lifa virku og innihaldsríku lífi.

Við ætlum að styðja markvisst við uppbyggingu lífsgæðakjarna fyrir eldri borgara þar sem samþætt verða húsnæði, þjónusta og félagsstarf. Samhliða því verður settur aukinn kraftur í uppbyggingu íbúðarhúsnæðis fyrir ört stækkandi hóp eldri borgara með það að markmiði að tryggja fjölbreytt val og stuðla að sjálfstæðri búsetu sem lengst.

Heilsuefling og virkni skipta sköpum fyrir lífsgæði. Við ætlum að halda áfram að efla hreyfi- og félagsúrræði fyrir eldri borgara með uppbyggingu íþróttamannvirkja, aukinni nýtingu lýðheilsukorts og innleiðingu á lýðheilsustyrk. Verkefnið Virk efri ár verður áfram í forgangi og við viljum gera þátttöku gjaldfrjálsa til að tryggja jafnt aðgengi og hvetja til aukinnar þátttöku. Áhersla okkar er að draga úr félagslegri einangrun, bæta heilsu og efla virkni íbúa á efri árum.

Við munum jafnframt tryggja að þjónusta við eldri borgara sé aðgengileg og sanngjörn. Áhersla verður lögð á hóflega gjaldtöku fyrir grunnþjónustu sveitarfélagsins, svo sem heimsendan mat, þjónustu í þjónustumiðstöðvum og heimaþjónustu. Lögð er áhersla á að tryggja að enginn þurfi að draga úr nauðsynlegri þjónustu vegna kostnaðar.

Með markvissri uppbyggingu, aukinni heilsueflingu og sanngjarnri þjónustu viljum við tryggja að Akureyri sé samfélag þar sem fólk getur elst með reisn, öryggi og virkni, fyrir enn betri bæ.

Fatlað fólk

Við munum halda áfram að þróa þjónustu sem styður við sjálfstæða búsetu fatlaðs fólks með uppbyggingu fjölbreyttra íbúðalausna og aukinni áherslu á notendastýrðar þjónustuleiðir. Markmið okkar er að tryggja að þjónustuúrræði taki mið af einstaklingsbundnum þörfum og að biðlistar eftir búsetuúrræðum styttist á kjörtímabilinu.

Við viljum jafnframt efla samráð við notendur þjónustunnar og aðstandendur þeirra til að tryggja að velferðarþjónusta sveitarfélagsins þróist í takt við raunverulegar þarfir samfélagsins. 

Með markvissri uppbyggingu, nýtingu velferðartækni og sterkari áherslu á forvarnir viljum við styrkja samfélagið í heild og bæta lífsgæði íbúa til framtíðar.