Berglind Ósk Guðmundsdóttir

bæjarstjóri

Berglind Ósk er fædd í Reykjavík 7. júlí 1993 og uppalin þar. Hún útskrifaðist með stúdentspróf frá Menntaskólanum Hraðbraut 2011 og útskrifaðist með BA-gráðu í lögfræði frá Háskólanum á Akureyri 2016 og meistaragráðu í lögfræði í júní 2018. Berglind Ósk hefur verið héraðsdómslögmaður frá árinu 2021.

Á milli stúdentsprófs og háskóla starfaði Berglind Ósk sem yfirmaður í eldhúsi og síðan framleiðslustarfsmaður í álverinu á Reyðarfirði. Samhliða námi starfaði Berglind Ósk á sambýli fyrir fatlaða og eitt sumar sem bókari hjá Norðlenska. Hún tók að sér aðstoðarkennslu í Háskólanum og kenndi hluta úr námskeiði á haustönn 2017. Að útskrift lokinni starfaði hún á lögfræðistofunni Lögmenn Norðurlandi og var lögfræðingur rektorsstofu Háskólans á Akureyri 2019-2021.

Þegar Berglind Ósk hóf nám við Háskólann á Akureyri tók hún strax mikinn þátt í félagslífi skólans og hagsmunabaráttu nemenda. Meðal annars hefur hún setið í stjórn Félagsstofnunar stúdenta á Akureyri á árunum 2014-2018, verið formaður Þemis, félags laganema, varaformaður Félags stúdenta við Háskólann á Akureyri og setið í háskólaráði Háskólans á Akureyri 2014-2018.

Berglind Ósk sat á Alþingi á árunum 2021-2024. Á þeim tíma sat hún í atvinnuveganefnd, stjórnskipunar- og eftirlitsnefnd, og Íslandsdeild þingmannaráðstefnu um norðurskautsmál. Hún var 2. varaformaður atvinnuveganefndar 2023-2024.

Berglind Ósk hefur verið bæjarstjóri á Akureyri og oddviti Sjálfstæðisflokksins í bæjarstjórn Akureyrar frá árinu 2026.

Hún var varabæjarfulltrúi Sjálfstæðisflokksins á Akureyri 2018-2021, sat í frístundaráði Akureyrarbæjar 2018-2020, í stjórn Akureyrarstofu og formaður Fallorku 2020-2021.

Berglind Ósk sat í stjórn Varðar, félags ungra sjálfstæðismanna á Akureyri 2015-2016 og 2018-2020, Sjálfstæðisfélags Akureyrar 2019-2021, Landssambands sjálfstæðiskvenna 2018-2021 og í stjórn Sambands ungra sjálfstæðismanna 2019-2021. Hún sat í stjórn Góðvina Háskólans á Akureyri og formaður Góðvina um skeið.

Eiginmaður Berglindar Óskar er Daníel Matthíasson. Hún á þrjú börn; Emilíu Margréti, Anton Darra og Marín Erlu.

Heimir Örn Árnason
bæjarfulltrúi

Heimir Örn er fæddur á Akureyri 5. maí 1979. Hann lauk stúdentsprófi frá Verkmenntaskólanum á Akureyri með viðskiptafræði sem aðalval árið 2000 og BEd. prófi frá Kennaraháskóla Íslands árið 2006.

Heimir Örn hefur starfað við kennslu í 16 ár, fyrst við Ingunnarskóla en lengst af við Naustaskóla á Akureyri. Heimir Örn starfaði í stjórnunarteymi Naustaskóla sem deildarstjóri á árunum 2018-2022. Áður var Heimir framkvæmdastjóri Golfklúbbs Akureyrar. Heimir hefur verið mjög virkur í félagsmálum og sjálfboðaliðastarfi hjá KA og KA/Þór frá 2008, t.d. sem formaður unglingaráðs KA og KA/Þór.

Heimir er einnig með dómararéttindi og hefur klárað öll stig þjálfaramenntunar hér á landi í handknattleik. Hann hefur þjálfað meistaraflokk KA, Akureyri og Fylki í meistaraflokki karla í handknattleik og yngri flokka síðan 1995.

Heimir Örn hefur verið bæjarfulltrúi Sjálfstæðisflokksins á Akureyri frá 2022 og formaður umhverfis- og mannvirkjaráðs Akureyrarbæjar frá 2026. Heimir Örn hefur setið í bæjarráði frá 2022 og formaður bæjarráðs 2023-2026 og forseti bæjarstjórnar 2022-2023 og formaður fræðslu- og lýðheilsuráðs 2022-2026.

Heimir Örn á þrjú börn.