Nú fer að líða að lokum yfirstandandi þings og enn mörg mál óafgreidd, þar á meðal fjármálaáætlun. Orðræða stjórnarmeirihlutans um hin ýmsu mál sem á eftir að afgreiða hefur verið í belg og biðu og byggst að miklu leyti á frösum. Ræsum vélarnar er einn þeirra frasa. Nýjum hápunkti var hins vegar náð þegar þingmaður stjórnarmeirihlutans lét eftirfarandi orð falla í pallborðsumræðum á fundi sem Samtök fyrirtækja í fjármálaþjónustu héldu nýverið: „Á fjárlögum er nú kominn um 800 milljarða halli og við verðum að bregðast við með því að sækja meiri tekjur og þá er ekkert óeðlilegt að horfa þangað sem gengur vel, og það gengur bara vel í fjármálakerfinu.“ Það er ekki hægt annað en að staldra við þessi ummæli og velta því fyrir sér hvert við séum eiginlega komin á Alþingi þegar einu úrræðin sem ríkisstjórnin og þingmenn stjórnarmeirihlutans bera á borð landsmanna eru að auka álögur á þjóðfélagsþegna lýðveldisins, fólk og fyrirtæki sem hér búa og starfa. Markmið fjármálaáætlunar ríkisstjórnarinnar um að stöðva hallarekstur ríkissjóðs er gott og gilt. Hins vegar er það þyngra en tárum taki að hún ætli sér fyrst og fremst að reyna að ná því markmiði með því að auka álögur. Sér í lagi þegar fyrir liggur að hærri skattar og gjöld hafa almennt neikvæð áhrif á framtakssemi og verðmætasköpun fólks og fyrirtækja og áhrif þeirra á mögulegar framtíðartekjur ríkissjóðs óvissar, í besta falli. Að hugsa út fyrir vinstra boxið Það skal öllum ljóst vera að það eru aðrar leiðir færar til að stöðva hallarekstur ríkissjóðs. Fyrr á árinu lagði Sjálfstæðisflokkurinn fram efnahagstillögur sem einmitt leggja grunninn að annarri greiðfærri leið. Sjálfstæðisflokkurinn vill lækka skatta og álögur, leyfa atvinnulífinu að blómstra og létta róðurinn fyrir fólkið og fyrirtækin í landinu. Staðreyndin er nefnilega sú að takist að ýta undir verðmætasköpun og styðja við atvinnulífið með því að ríkið geri minna, betur, stækkar kakan sem hinar ýmsu álögur eru teknar af og ríkissjóður fær fleiri aura í vasann. Fyrrgreind ummæli þingmannsins lýsa ákveðnu viðhorfi til verðmætasköpunar og í raun til þeirrar áhættu sem fólk tekur þegar það ákveður að stofna og reka fyrirtæki. Það er óboðlegt öllum þeim sem hér búa og byggja þetta fallega land að ríkisstjórnin virðist ætla sér að seilast gegndarlaust í vasa fólks og fyrirtækja. Frasinn ræsum vélarnar virðist aðeins eiga við skattagleði ríkisstjórnarinnar. „Vér mótmælum allir“ eru fleyg orð sem látin voru falla við ærið tilefni á sínum tíma. Því miður eiga þau nú einnig við. Því fyrr sem ríkisstjórnin og þingmenn stjórnarmeirihlutans átta sig á því að verðmætin falla ekki af himnum ofan og að það er ekki hægt að auka álögur endalaust, því betra. Það verður að hugsa út fyrir vinstra boxið og finna aðrar lausnir. Undirritaður hvetur ríkisstjórnina, þingmenn stjórnarmeirihlutans og í raun þingheim allan til að líta til lausna Sjálfstæðisflokksins. Jens Garðar Helgason varaformaður Sjálfstæðisflokksins

Í nýsamþykktri samgönguáætlun er margt sem skiptir máli fyrir uppbyggingu innviða um allt land. Þar er fjallað um vegi, hafnir og ferjur, flugvelli og mikilvægar framkvæmdir sem eiga að styrkja samgöngukerfið til framtíðar. En þegar horft er til Akureyrarflugvallar vekur það sérstök vonbrigði að aðflugsljós við braut 19 – aðflug til suðurs – eru hornreka og ekki inni á fyrsta tímabili áætlunarinnar. Breytingartillagan Ég lagði fram breytingartillögu við samgönguáætlun þar sem lagt var til að framkvæmdinni yrði flýtt. Markmið tillögurnar var að hefja uppsetningu aðflugsljósa árið 2027 og ljúka framkvæmdinni 2028. Slík framkvæmd mun styrkja starfsemi flugvallarins, ný aðflugsljós skapa möguleika á bættum aðflugslágmörkum þannig að hægt er að lenda í verri veðurskilyrðum. Með því má bæta áreiðanleika vallarins og bætt getu hans til að sinna hlutverki sínu þar á meðal sem varaflugvöllur og alþjóðleg fluggátt fyrir Norður- og Austurland. Tillögunni var hins vegar hafnað. Það eru vonbrigði, því aðflugsljósin eru öryggismál, líkt og fram kemur í umsögn Öryggisnefndar FÍA við samgönguáætlun: ,,Á Akureyrarflugvelli eru framkvæmdir við aðflugsljós ekki fyrirhugaðar fyrr en eftir 2030. Þetta er óásættanlegt með tilliti til flugöryggis, sérstaklega í ljósi aukins hlutverks Akureyrarflugvallar í beinu flugi til erlendra áfangastaða“. Þau skipta máli þegar veður eru krefjandi, þegar skyggni er takmarkað og þegar tryggja þarf að flugvöllurinn geti nýst sem best þegar á reynir í erfiðum veðurskilyrðum. Mikilvægi nýrra aðflugsljósa á Akureyrarflugvelli Akureyrarflugvöllur hefur á undanförnum árum fengið aukið vægi. Beint millilandaflug hefur styrkt stöðu hans, ferðaþjónusta á Norðurlandi hefur notið góðs af og mikilvægi vallarins í varaflugvallakerfi landsins er augljóst. Ef stjórnvöld ætla að tala af alvöru um öruggar samgöngur og sterka innviði þarf forgangsröðunin að endurspegla það. Það er einfaldlega of seint að bíða með aðflugsljós til áranna 2031–2035. Flugöryggi á ekki að bíða eftir næsta tímabili samgönguáætlunar. Þótt breytingartillögu minni hafi verið hafnað í nýrri samgönguáætlun er málinu ekki lokið af minni hálfu. Áfram þarf að þrýsta á um að aðflugsljós á Akureyrarflugvelli verði færð framar í forgangsröðina, enda hefur vöntun þeirra þegar truflað reglubundið millilandaflug sem nú er stundað. Í breytingartillögunni við samgönguáætlun lagði ég einnig til að framkvæmdatími við nýja akbraut við norðurenda flugbrautarinnar á Egilsstöðum yrði styttur um tvö ár og yrði þrjú ár en ekki fimm ár eins og gert er ráð fyrir í nýsamþykktri áætlun. Fullfjármagnað með varaflugvallagjaldinu Hér er rétt að hafa í huga að þessar framkvæmdir eru nú þegar fullfjármagnaðar í gegnum nýja varaflugvallagjaldið sem farið var að rukka inn 1. nóvember 2023. Ný samgönguáætlun er afturför fyrir flugið á Íslandi sem er stór og mikil atvinnugrein eins og við þekkjum. Hér er verið að draga úr fjárveitingum til flugsins. Það er ekki verið að fara eftir því plani sem unnið hefur verið eftir á síðustu árum. Ég hef áður bent á að núverandi innviðaráðherra er að draga úr fjármagni sem ætlað hefur verið til nýframkvæmda og viðhalds í gegnum þjónustusamning ríkisins við Isavia Innanlandsflugvelli. Nú bætist við að innviðaráðherrann og meirihluti þingsins ætlar sér ekki að nýta að fullu það fjármagn sem innheimt er í gegnum varaflugvallagjaldið. Þar með er beinlínis gengið gegn löggjöf um varaflugvellina frá í júní 2023, sem styrkja átti hlutverk þeirra. Leiðréttum kúrsinn Sterkur Akureyrarflugvöllur er ekki aðeins hagsmunamál Akureyrar eða Norðurlands. Hann er hluti af öryggisneti þjóðarinnar. Þess vegna á uppbygging hans að vera forgangsmál í samgönguáætlun. Nú er mikilvægt að leiðrétta stefnuna, leiðrétta kúrsinn. Njáll Trausti Friðbertsson alþingismaður Sjálfstæðisflokksins í Norðausturkjördæmi

Nýr meirihluti hefur nú tekið til starfa í Akureyrarbæ með skýra sýn og metnaðarfullan málefnasamning að leiðarljósi. Fram undan eru mikilvægar ákvarðanir og verkefni sem munu móta samfélagið okkar til framtíðar og við göngum til þeirra verka með ábyrgð, samvinnu og bjartsýni að leiðarljósi. Málefnasamningur meirihlutans byggist á þeirri sannfæringu að bærinn búi yfir miklum styrkleikum og fjölmörgum tækifærum. Við ætlum að leggja áherslu á öfluga þjónustu við íbúa, áframhaldandi kröftuga uppbyggingu og markvissar aðgerðir til að efla lífsgæði í sveitarfélaginu. Þar má nefna aukna áherslu á húsnæðismál, skemmtilegt bæjarlíf, góða menntun, trausta velferð og öflugt atvinnulíf sem skapar verðmæti og fjölbreytt störf. Aukin samkeppnishæfni og ábyrgur rekstur Á sama tíma ætlum við að sýna ábyrgð í rekstri sveitarfélagsins. Háir vextir og verðbólga hafa gríðarleg áhrif á heimili, fyrirtæki og sveitarfélög um land allt. Þótt vonir standi til að efnahagsaðstæður fari smám saman batnandi á næstu misserum eru enn blikur á lofti og því mikilvægt að gæta aðhalds, forgangsraða verkefnum af skynsemi og tryggja að fjármunir bæjarbúa séu nýttir með sem bestum hætti. Eitt af meginmarkmiðum okkar er að fjölga íbúum og styrkja samkeppnishæfni bæjarins. Til þess þarf sveitarfélagið að vera eftirsóknarverður staður til búsetu, atvinnusköpunar og fjárfestinga. Við viljum efla samstarf við atvinnulífið, einfalda ferla þar sem kostur er og skapa umhverfi sem styður við frumkvæði, nýsköpun og vöxt. Sterkt atvinnulíf er forsenda öflugs samfélags. Hagsmunir bæjarbúa í fyrirrúmi Við munum einnig standa vörð um hagsmuni bæjarbúa gagnvart ríkisvaldinu. Sveitarfélög gegna lykilhlutverki í daglegu lífi fólks og mikilvægt er að verkefni og fjármögnun fari saman. Við munum beita okkur af festu fyrir þeim innviðum og þeirri þjónustu sem samfélagið okkar þarf á að halda. Framtíðin verður ekki aðeins mótuð af þeim lausnum sem við finnum á áskorunum heldur einnig af þeim tækifærum sem við nýtum. Með samstilltu átaki, ábyrgri stjórn og skýrri framtíðarsýn erum við sannfærð um að fram undan séu góðir tímar fyrir bæinn okkar og alla íbúa hans. Berglind Ósk Guðmundsdóttir bæjarstjóri og oddviti Sjálfstæðisflokksins á Akureyri

Kæru Akureyringar, Hríseyingar og Grímseyingar, Í dag vil ég hvetja ykkur öll til þess að mæta á kjörstað. Sveitarstjórnarkosningar snúast um nærumhverfið okkar, þjónustuna sem við treystum á og framtíðina sem við viljum byggja saman í Akureyrarbæ. Hvert atkvæði skiptir máli. Það hefur v erið ótrúlega gefandi að fá að hitta ykkur víðsvegar um sveitarfélagið, hlusta á skoðanir og ræða framtíð Akureyrarbæjar. Við í Sjálfstæðisflokknum erum stolt af því sem hefur áunnist á kjörtímabilinu og það gleður okkur að sjá að yfir 90% íbúa segjast ánægðir með að búa í Akureyrarbæ, það er merki um samfélag sem byggir á sterkum grunni. Við stóðum við þau loforð sem við gáfum á kjörtímabilinu og erum stolt af þeim verkum sem hafa áunnist undir okkar stjórn. Það er okkur hjartans mál að Akureyrarbær standi ekki í stað heldur vaxi og dafni sem öflugt samfélag þar sem fólk sér tækifæri og horfir björtum augum til framtíðar. Sjálfstæðisflokkurinn leggur áherslu á áfra mhaldandi ábyrgan og traustan rekstur bæjarins. Við viljum setja meiri kraft í uppbyggingu á fjölbreyttu húsnæði svo ungt fólk og fjölskyldur geti fest hér rætur og eldri borgarar geti notið húsnæðisöryggis á efri árum. Þá viljum við styrkja grunnþjónustuna, bæta aðgengi og lífsgæði fyrir einstaklinga með fatlanir og skapa samkeppnishæft og öflugt umhverfi fyrir atvinnulífið þar sem fyrirtæki geta vaxið og störfum fjölgað. Á bak við þessi stefnumál stendur öflugur hópur fólks. Framboðsl isti Sjálfstæðisflokksins á Akureyri er skipaður fólki með fjölbreyttan bakgrunn, ólíka reynslu en fyrst og fremst sameiginlegan metnað fyrir sveitarfélagið okkar. Fólkið sem býr og starfar hér og þekkir samfélagið af eigin raun. Til að halda áfram að byggja upp öflugt samfélag þarf kjark til að taka ákvarðanir, ábyrgð til að standa við þær og kraft til að fylgja þeim eftir. Það eru þau gildi sem Sjálfstæðisflok kurinn stendur fyrir. Við erum svo lánsöm að við búum í samfélagi þar sem við þekkjum hvert annað, hjálpum st að og viljum að öllum líði vel, hvort sem það er ungt fólk að stíga sín fyrstu skref, fjölskyldur að byggja sér framtíð eða eldri borgarar sem eiga skilið öryggi og góð lífsgæði. Framtíð bæjarins mótast af þeim ákvörðunum sem teknar eru í dag og þess vegna skiptir k osningadagurinn máli.  Nú er komið að því að ákveða í hvaða átt við viljum halda áfram. Ekki bara fyrir næstu fjögur árin heldu r fyrir þá framtíð sem við viljum sjá fyrir samfélagið okkar. Ég trúi því að Akureyrarbær eigi sín bestu ár fram undan og ég vona að þið takið þátt í að móta þá framtíð með okkur. Ég óska eftir stuðningi ykkar við Sjálfstæðisflokkinn og hvet ykkur til að mæta á kjörstað í dag. Berglind Ósk Guðmundsdóttir, oddviti Sjálfstæðisflokksins á Akureyri

Akureyrarbær hefur lengi verið þekktur fyrir fallegt umhverfi og góða ásýnd. Á undanförnum árum hefur þó sérstaklega vel tekist til í umhirðu bæjarins. Hreinar götur, snyrtileg opin svæði og fallegt bæjarlandslag skipta ekki aðeins máli fyrir ásýndina heldur hefur bein áhrif á lífsgæði íbúa, andlega líðan og upplifun þeirra sem sækja bæinn heim. Vel þrifnar götur og gangstéttir, reglulegur sláttur grænna svæða og góð umgengni skapa tilfinningu fyrir skipulagi, virðingu og samstöðu. Akureyrarbær ber þess víða merki að hér sé hugsað vel um nærumhverfið. Það birtist meðal annars í snyrtilegum miðbæ, vel hirtum íbúðahverfum og fallegum almenningssvæðum sem íbúar nýta sér daglega. Markviss vinna og fjárfesting Árangurinn er ekki síst afrakstur markvissrar vinnu innan umhverfis- og mannvirkjasviðs Akureyrarbæjar (UMSA) og góðrar forgangsröðunar í umhverfis- og mannvirkjanefnd. Þar hefur verið unnið af fagmennsku að því að bæta ásýnd bæjarins, styrkja þjónustu og viðhalda þeim gæðum sem þegar eru til staðar. Slík vinna er oft ósýnileg í daglegu lífi en verður augljós þegar hún skilar sér vel eins og raunin er í dag. Í fjárhagsáætlun Akureyrarbæjar fyrir árið 2026 er gert ráð fyrir 35,2 milljónum króna til reksturs og viðhalds umhverfismála á Akureyri, Hrísey og Grímsey. Markmiðið er að bæta og viðhalda útivistarsvæðum, efla græna innviði, styrkja loftslags- og umhverfisverkefni og auka aðgengi og upplifun íbúa og gesta. Af heildarfjárhæðinni fara: ● 27,2 m.kr. til Akureyrar ● 6,0 m.kr. til Hríseyjar ● 1,5 m.kr. til Grímseyjar Uppbygging og fegrun Helstu verkefni á Akureyri snúa að fegrun bæjarlandsins, uppbyggingu útivistarsvæða og innleiðingu umhverfis- og loftslagsaðgerða. Áhersla er lögð á endurnýjun innviða í Lystigarði Akureyrar, meðal annars með endurnýjun gróðurkanta og uppsetningu nýrra bekkja. Einnig er gert ráð fyrir gróðursetningu trjáa og runna víðs vegar um bæinn, meðal annars í tengslum við innleiðingu 3-30-300 reglunnar. Framhald verður á verkefninu Græni trefillinn með frekari gróðursetningu norðan Glerár og þéttingu skógræktar sunnan árinnar. Samhliða verður unnið að endurskoðun skógræktarskipulags bæjarins. Unnið verður áfram að innleiðingu umhverfis- og loftslagsstefnu Akureyrarbæjar, þar á meðal verkefnum tengdum loftgæðaspám. Í Kjarnaskógi verður lögð áhersla á brunavarnir með kaupum á haugsugu í samstarfi við Skógræktarfélagið, uppsetningu leiktækja og lagfæringum í kringum Múmínkastala. Þá verða stígakerfi endurbætt í Kjarnaskógi, Naustaborgum og Krossanesborgum, auk þess sem upplýsingaskilti og göngubýr verða endurnýjaðar. Í Hrísey er lögð áhersla á uppbyggingu og frágang hátíðarsvæðisins, þar sem meðal annars verður lokið við grillhús, gerðar lagfæringar á sviði og unnið að gróðursetningum og almennum frágangi. Einnig er áætlað að smíða og setja upp handrið við sjósund stiga, setja upp nýja fánastöng við Hlein og kaupa og koma fyrir utandyra þrektækjum á hátíðarsvæðinu. Í Grímsey er gert ráð fyrir fjármagni til almennrar fegrunar umhverfisins með það að markmiði að bæta ásýnd og umgengni á eyjunni. Ávinningur fyrir íbúa og samfélag Verkefnin fyrir árið 2026 byggja á góðum grunni fyrri ára. Árið 2025 var ráðist í fjölda umfangsmikilla verkefna sem hafa þegar skilað sýnilegum árangri. Þar má meðal annars nefna: uppsetningu Múmínkastala, þrektækja og annarra leiktækja í Kjarnaskógi, lagfæringar á stígum í Kjarnaskógi, Naustaborgum og Krossanesborgum. Auk ýmissa fegrunar- og innviðaverkefna í Hrísey og Grímsey. Þessi verkefni mynda mikilvægan grunn fyrir áframhaldandi þróun og viðhald umhverfis- og útivistarsvæða árið 2026. Vetrarþjónustan er einnig mikilvægur þáttur í heildarmyndinni. Vel mokaðar götur, hreinsaðar gangstéttir og greiðfært um bæinn yfir vetrartímann skipta sköpum fyrir öryggi íbúa, aðgengi og almenna líðan. Þegar vel tekst til finna íbúar fyrir því og traust til bæjarins styrkist. Fallegur og snyrtilegur bær hefur einnig víðtækari áhrif. Hann laðar að ferðamenn, styrkir ímynd bæjarins og eykur ánægju þeirra sem hér búa og starfa. Umhverfið sendir skýr skilaboð um að Akureyrarbær sé sveitarfélag sem leggur metnað í gæði, skipulag og ábyrgð. Það er því mikilvægt að hrósa því sem vel er gert og á sama tíma leggja áherslu á að halda þessari vegferð áfram. Gæði í umhirðu og ásýnd eru ekki sjálfgefin; þau krefjast stöðugrar athygli, samvinnu og skýrrar forgangsröðunar. Viljum við halda Akureyri áfram hreinni, fallegri og aðlaðandi, þá er mikilvægt að standa vörð um þá góða vinnu sem nú þegar er í gangi og tryggja að í bænum verði áfram græn svæði. Akureyri á skilið að vera áfram hreinn bær, fagur bær. Ef við viljum að Akureyrarbær haldi áfram að vera hreinn, fallegur og aðlaðandi þurfum við sð standa vörð um þá góðu vinnu sem þegar er í gangi og halda áfram að efla græn svæði. Akureyrarbær á skilið að vera áfram hreinn bær og fagur bær. Þórhallur Harðarson skipar 4. sæti á lista Sjálfstæðisflokksins á Akureyri og nefndarmaður í UMSA

Sveitarstjórnarkosningarnar 16. maí snúast um forgangsröðun. Fyrir mér er eitt ljóst: öflugt atvinnulíf er lykillinn að sterkum Akureyrarbæ. Sem íbúi í Hrísey þekki ég vel hversu mikil áhrif atvinnuöryggi og tækifæri hafa á lífsgæði fólks. Það sama á við um íbúa í Grímsey. Hvort sem störfin eru í eyjunum eða á Akureyri skiptir máli að umhverfið sé þannig að fólk geti byggt upp rekstur, skapað störf og séð framtíð sína í heimabyggð. Sveitarfélagið á ekki að flækja líf þeirra sem vilja skapa verðmæti heldur greiða leið þeirra. Það þýðir einfaldara regluverk, skilvirkari þjónustu og jákvætt viðmót gagnvart fyrirtækjum. Við þurfum að hugsa Akureyrarbæ sem samkeppnishæfan valkost fyrir fyrirtæki, bæði innanlands og á alþjóðavettvangi. Smærri fyrirtæki eru burðarás atvinnulífsins og þau eiga skýran stuðning skilið. Jafnframt verðum við að horfa til framtíðar. Nýsköpun, tæknilausnir og sjálfbær atvinnuuppbygging eru raunveruleg tækifæri sem við eigum að nýta betur. Gott dæmi er Drift EA, óhagnaðardrifið félag sem vinnur að því efla nýsköpun á Norðurlandi og hjálpar frumkvöðlum og sprotafyrirtækjum að þróa hugmyndir og vaxa. Fyrir íbúa í Hrísey og Grímsey eru góðar samgöngur lykilatriði. Tryggar ferjusiglingar, áreiðanlegt flug til Grímseyjar og öflug stafræn tenging eru ekki jaðarmál heldur forsenda þess að byggðirnar geti blómstrað og tengst atvinnulífi Akureyrar á raunhæfan hátt. Sterkt atvinnulíf skilar sér í betri þjónustu, sterkari innviðum og meiri lífsgæðum fyrir alla. Það er verkefnið sem við stöndum frammi fyrir. Ég býð mig fram fyrir Sjálfstæðisflokkinn vegna þess að ég vil sjá Akureyrarbæ þróast áfram sem kraftmikið samfélag þar sem framtak fær að njóta sín bæði í þéttbýlinu og í eyjunum okkar. Kristinn Frímann Árnason situr í 10. sæti á framboðslista Sjálfstæðisflokksins á Akureyri í kosningum 16. maí nk.

Á undanförnum vikum hef ég orðið vör við upplýsingaóreiðu varðandi hvað fasteignagjöld og fasteignaskattur eru í raun og veru. Fasteignagjöld samanstanda af lóðarleigu, sorphirðugjaldi og vatns- og fráveitugjaldi sem ákvarðast af gjaldskrá Norðurorku og fasteignaskatti. Fasteignaskattur er rúmlega helmingur fasteignagjalda og vegur því þungt í skattheimtu sveitarfélaga gagnvart heimilum og fyrirtækjum. Í grunninn er hann einfaldur: ákveðin prósenta af fasteignamati. Áhrifin eru þó langt frá því að vera einföld. Þegar fasteignamat hækkar, hækkar skatturinn sjálfkrafa – jafnvel þó tekjur heimila eða rekstur fyrirtækja standi í stað. Það er kjarninn. Fasteignaskattur getur hækkað án þess að formleg ákvörðun um skattahækkun sé tekin. Þess vegna er lækkun álagningarprósentu eitt áhrifamesta stjórntæki sveitarfélaga til að lækka álögur á íbúa og fyrirtæki. Með því að lækka skatta á bæði heimili og fyrirtæki sendir Akureyrarbær skýr skilaboð um að hann ætli að skapa hagstæðara rekstrarumhverfi, laða að fjárfestingar og bæta lífsgæði íbúa. Ákvörðunin fellur vel að þeirri þróun sem víða hefur átt sér stað á Íslandi, þar sem sveitarfélög hafa brugðist við skarpri hækkun fasteignamats og aukinni skattbyrði með markvissum lækkunum fasteignaskatts. Óhófleg hækkun kallar á viðbragð Undanfarin ár hafa fasteignagjöld víða hækkað umfram verðlag og laun. Félag atvinnurekenda, Húseigendafélagið og Landssamband eldri borgara hafa bent á að skattheimta vegna fasteigna hafi vaxið stjórnlaust og bitnað bæði á heimilum og atvinnulífi. Þessi þróun hefur aukið þrýsting á sveitarfélög að grípa inn í. Lækkun fasteignaskatts er því ekki einungis fjárhagsleg ákvörðun heldur mikilvæg samfélagsleg aðgerð. Þung byrði á atvinnulífið Greiningar sýna að fasteignagjöld leggjast sérstaklega þungt á fyrirtæki. Atvinnuhúsnæði er aðeins um 9% allra fasteigna á landinu en af því er greiddur rúmur helmingur allra fasteignagjalda. Þessi staða hefur skýr áhrif: ● Rekstrarkostnaður fyrirtækja hækkar og samkeppnishæfni veikist ● Kostnaður skilar sér í hærra leiguverði á bæði atvinnu- og íbúðarhúsnæði Það er því eðlilegt að bæði atvinnulífið og hagfræðingar kalli eftir lækkun gjaldanna, sérstaklega í ljósi skarpra hækkana fasteignamats undanfarin ár. Fasteignaskattar á atvinnuhúsnæði leggjast á fyrirtæki óháð því hvernig reksturinn gengur. Fyrirtæki þurfa því að greiða skattana jafnvel þótt þau séu rekin með tapi eða standi frammi fyrir samdrætti. Í niðursveiflu geta þessar álögur aukið verulega á rekstrarvanda fyrirtækja og gert erfiða stöðu enn þyngri. Fasteignaskatturinn er um helmingur af fasteignagjöldum og er því ábyrgð sveitarfélaga mikil þegar kemur að ákvörðun skattprósentunnar. Á liðnu kjörtímabili höfum við brugðist við þessari þróun og stigið mikilvæg skref til að draga úr álögum. Við viljum halda þeirri vegferð áfram á næsta kjörtímabili með enn markvissari aðgerðum að lægri álögum, sterkari rekstrarskilyrðum fyrirtækja og auknum stöðugleika. Lækkun fasteignaskatts skilar árangri Reynslan á Akureyri og í þeim sveitarfélögum á landinu sem hafa lækkað fasteignaskatt sýnir að lækkunin kemur sér vel fyrir íbúa og atvinnulíf. Við lækkuðum fasteignaskatta á íbúðarhúsnæði í tvígang á liðnu kjörtímabili, fyrst 2023 og svo aftur 2026 og erum þar með í hópi sveitarfélaga sem hafa farið þá leið að lækka skatta. Auk þess lækkuðum við álagningarprósentuna um 2 punkta á atvinnuhúsnæði. Kópavogur hefur markvisst lækkað fasteignaskatt á atvinnuhúsnæði, sem hefur skilað sér í betri rekstrarskilyrðum og auknu aðdráttarafli fyrir fyrirtæki. Slík þróun bendir til þess að sveitarfélög sem lækka fasteignaskatt laði frekar að sér fyrirtæki og styðji betur við atvinnulífið. Það rímar vel við áherslur okkar um að gera Akureyrarbæ að besta sveitarfélaginu til að reka fyrirtæki í. Ávinningur fyrir íbúa og samfélag Lækkun fasteignaskatts hefur bein áhrif á heimilin. Þegar gjöld lækka eykst ráðstöfunarfé, húsnæðiskostnaður lækkar og hvati til uppbyggingar og viðhalds eykst. Jafnframt dregur aðgerðin úr þrýstingi á verðbólgu og vaxtahækkanir. Samtök í þágu heimila og eldri borgara hafa bent á að hækkun fasteignaskatts hafi víða dregið úr lífsgæðum. Markviss lækkun er því mikilvæg aðgerð til að bæta stöðu fjölskyldna og eldra fólks. Samhliða þessu viljum við hækka tekjumörk í reglum um afslátt af fasteignagjöldum hjá tekjulitlum, elli- og örorkulífeyrisþegum. Sterkari staða til framtíðar Stefna Sjálfstæðisflokksins er skýr. Við ætlum að halda áfram að lækka álögur á íbúa og fyrirtæki. Við ætlum að halda áfram að taka skýr skref í átt að öflugra atvinnulífi og bættum lífskjörum. Áframhaldandi lækkun fasteignaskatts í Akureyrarbæ er nauðsynleg, ábyrg og framsækin ákvörðun sem mun hafa jákvæð áhrif bæði á atvinnulíf og íbúa fyrir enn betri betri Akureyrarbæ. Berglind Ósk Guðmundsdóttir oddviti Sjálfstæðisflokksins á Akureyri

Reykjavíkurflugvöllur er ekki aðeins samgöngumannvirki. Hann er eitt helsta öryggismannvirki landsins. Hann er hluti af heilbrigðiskerfinu, hluti af almannavörnum, mikilvægur varaflugvöllur eins og sýndi sig 26. febrúar sl. þegar Keflavíkurflugvöllur lokaðist og fjöldi farþegaþotna í millilandaflugi lentu á varaflugvöllum landsins og þar með talið á Reykjavíkurflugvelli. Þá er flugvöllurinn lífæð landsbyggðarinnar. Þegar við ræðum framtíð flugvallarins verðum við að horfa á þetta stóra samhengi, ekki aðeins skipulagsmál innan borgarmarka eins og meirihlutinn í Reykjavík hefur lagt áherslu á síðastliðin ár. Húsnæðisáætlun Reykjavíkur 2025-2034 Hér má geta þess að í húsnæðisáætlun Reykjavíkur 2025-2034 sem samþykkt var 15. maí 2025 í borgarstjórn er ekki gert ráð fyrir Reykjavíkurflugvelli í Vatnsmýrinni og greinilega litið á þetta mál sem einkamál meirihlutans í Reykjavík. Meirihlutinn hefur búið í ákveðnum hliðarveruleika í sinni nálgun gagnvart flugvellinum og gefur ekkert fyrir höfuðborgarhlutverk Reykjavíkur. Landspítalinn Bráðaheilbrigðisþjónusta á Íslandi byggir á því að hægt sé að koma bráðveikum og slösuðum sjúklingum hratt og örugglega á Landspítalann þar sem öflugasta og sérhæfðasta sjúkrahúsþjónustan er til staðar í landinu og í mörgum tilfellum eina sjúkrahúsið sem veitir þá lífsbjargandi meðferð sem viðkomandi sjúklingur gæti þurft á að halda. Fyrir fólk á Norðurlandi, Austurlandi, Vestfjörðum, í Vestmannaeyjum og víðar getur hver mínúta skipt máli og er sjúkraflugið því oft eini rauhæfi valkosturinn fyrir þessa einstaklinga. Þá skiptir það gríðarlegu miklu máli að hægt sé að lenda nálægt Landspítalanum og þeirri sérfræðiþjónustu sem þar er til staðar. Reykjavíkurflugvöllur gegnir þar lykilhlutverki, er lykilinnviður. Sjúkraflugið 2025 Tölurnar sýna líka hversu mikilvæg þessi þjónusta er orðin. Í fyrra voru flogin 870 sjúkraflug með 923 sjúklinga. Það er gríðarleg aukning frá árinu 2002, þegar flugin voru um 200, eftir að sjúkraflugið var tekið upp í þeirri mynd sem við þekkjum það í dag. Þessi þróun sýnir að þörfin er raunveruleg og vaxandi. Myndræn framsetning Í fyrri skrifum um sjúkraflugið á Íslandi hef ég sett fjölda fluga upp með myndrænum hætti. Á meðfylgjandi mynd má sjá hvernig sjúkrafluginn innanlands í fyrra skiptast niður á flugvelli landsins. Það auðveldar fólki að skynja fjölda þeirra. Það er því ábyrgðarhluti að tala um að þrengja að starfsemi Reykjavíkurflugvallar án þess að tryggja að jafn góður eða betri kostur taki við og sé til staðar. Slík ákvörðun snýst ekki aðeins um flugvélar og flugbrautir. Hún snýst um jafnan rétt landsmanna til heilbrigðisþjónustu þegar mest á reynir. Mikilvægur öryggisinnviður Ég tel að við eigum að standa vörð um Reykjavíkurflugvöll sem mikilvægan hlekk í sjúkraflugi landsins, mikilvægan öryggisinnvið. Það er ekki sérhagsmunamál heldur mál sem snýr að almannahagsmunum. Hreint þjóðaröryggismál. Ábyrgð borgarfulltrúa Nú fara sveitarstjórnarkosningar í hönd og því er mikilvægt fyrir kjósendur í Reykjavík að vita hvaða flokkar ætla að standa vörð um Reykjavíkurflugvöll og tryggja þar með aðgengi sinna ættingja og vina á landsbyggðinni að lífsbjargandi heilbrigðisþjónustu. Njáll Trausti Friðbertsson alþingismaður Sjálfstæðisflokksins í Norðausturkjördæmi - skipar 21. sætið á framboðslista Sjálfstæðisflokksins á Akureyri

Hlíðarfjall hefur á undanförnum árum þróast í einn stærsta vetraráfangastað landsins. Aðsókn hefur aukist jafnt og þétt og um helgar sækja þúsundir gesta fjallið þegar best lætur. Samhliða þessu hefur starf Skíðafélags Akureyrar (SKA) vaxið hratt og iðkendafjöldi tvöfaldast á um þremur árum. Ljóst er að mikill áhugi er fyrir íþróttunum í Hlíðarfjalli og mikilvægt að innviðir og starfsemi fjallsins geti tekið á móti öllum sem vilja koma, bæði almenningi og keppnisfólki. Andrésar andar leikarnir eru stærsti einstaki viðburðurinn í starfi skíðafélagsins og einn stærsti íþróttaviðburður landsins yfir vetrartímann. Þegar 50 ára afmælisleikarnir voru haldnir dagana 22.–25. apríl, tóku tæplega 1.100 keppendur þátt og ríflega 3.500 gestir komu til Akureyrar vegna þeirra. Aldrei hafa fleiri iðkendur frá SKA tekið þátt eða 274 talsins. Þessi mikla þátttaka endurspeglar vel þann vöxt sem orðið hefur í starfsemi félagsins og skýrir að hluta til það mikla álag sem nú er á fjallinu. Í vetur hafa flestir laugardagar verið þétt setnir enda fjölskyldur iðkenda einnig virkir notendur svæðisins á æfingartímum. Mikilvægt fyrir atvinnulíf og ferðaþjónustu Hlíðarfjall gegnir mjög stóru hlutverki í vetrarferðamennsku á Akureyri og styrkir atvinnulíf bæjarins á þeim tíma árs þegar annars hægir á. Á Akureyri er öflug þjónusta til staðar, svo sem hótel, veitingastaðir, fjölbreytt afþreying og öflugt íþróttastarf. Vegna þessa hefur Hlíðarfjall mikla möguleika til frekari vaxtar sem áfangastaður.* Vetraríþróttamiðstöð Íslands er staðsett á Akureyri og var stofnuð árið 1995 með það að markmiði að efla vetraríþróttir, fræðslu og útivist. Um aldamótin studdi miðstöðin uppbyggingu í Hlíðarfjalli með fjármagni sem skilaði góðum árangri. Síðan þá hefur starfsemin að mestu legið niðri en á þessu kjörtímabili hafa verið stigin skref í átt að því að endurvekja hana. Aðkoma miðstöðvarinnar að nýju getur skipt verulegu máli fyrir frekari uppbyggingu Hlíðarfjalls, sérstaklega með því að styrkja fjárhagslegan grundvöll verkefna og gera umfangsmeiri framkvæmdir mögulegar. Með slíkum stuðningi og vel ígrunduðu framtíðarskipulagi er möguleiki að byggja Hlíðarfjall upp sem þjóðarleikvang vetraríþrótta á Íslandi þar sem aðstaða fyrir almenning og afreksstarf stenst þær kröfur sem gerðar eru til slíkra svæða. Markviss uppbygging skiptir máli Undanfarin ár hafa verið stigin mikilvæg skref í uppbyggingu í Hlíðarfjalli. Sú reynsla sýnir hins vegar að án skýrrar framtíðarsýnar verða framkvæmdir síður markvissar og dýrari en þær þurfa að vera. Mikilvægt er að fyrir liggi skýr stefna og markmið með allri uppbyggingu. Heildarsýn þarf að vera til staðar svo innviðauppbygging verði bæði hagkvæm og skynsamleg til lengri tíma. Mikilvægt er að skoða alla snertifleti sem til staðar eru áður en lagt er af stað í framkvæmdir. Samhliða því þarf að horfa til rekstrar svæðisins í heild sinni og hvernig þróa megi starfsemina þannig að Hlíðarfjall verði til framtíðar sjálfbært og tekjuberandi. Fagþekkingu skíðafélagsins þarf að nýta Skíðafélag Akureyrar hefur vaxið hratt á undanförnum árum. Tækifæri eru til frekari vaxtar en mikilvægt er að nýta þá sérþekkingu og reynslu sem félagar í Skíðafélagi Akureyrar búa að. Skíðafélagið þarf að koma með formlegum hætti að ákvörðunum um stórar framkvæmdir í Hlíðarfjalli þannig að fagþekking nýtist við undirbúning og framkvæmd þessara verkefna. Jafnframt er nauðsynlegt að bæta samþættingu milli starfsemi Hlíðarfjalls og skíðafélagsins. Með þátttöku skíðafélagsins í rekstri og þróun svæðisins má tryggja að uppbygging innviða nýtist sem bæði almenningi og íþróttastarfi sem best og leiði þannig til hagkvæmari framkvæmda. Jafnframt verður betri samþætting milli mismunandi þátta svæðisins sem stuðlar að skynsamlegri uppbyggingu og betri nýtingu fjármuna. Tækifærin eru til staðar Skíðafélag Akureyrar skilaði inn aðgerðaráætlun til umhverfis- og mannvirkjasviðs Akureyrarbæjar í janúar 2025 með það að markmiði að fjölga opnunardögum í Hlíðarfjalli að hausti til. Sumarið 2025 var byrjað að vinna eftir áætluninni og með tiltölulega litlu inngripi tókst strax að fjölga opnunardögum án þess að ráðist væri í kostnaðarsamar eða yfirgripsmiklar framkvæmdir. Í framhaldi af þessari vinnu er jafnframt hafinn undirbúningur að landmótun Hjallabrautar, sem er eitt af lykilverkefnum í fyrsta áfanga aðgerðaráætlunarinnar. Á nútíma skíðasvæðum sem taka á móti fjölskyldum er lögð áhersla á fjölbreytta afþreyingu, svo sem leikjabrautir, brettapark og aðra upplifun fyrir breiðan hóp notenda. Mikilvægt er að móta skýra stefnu um slíka uppbyggingu í Hlíðarfjalli til að bæta upplifun gesta og auka aðdráttarafl svæðisins. Þar getur Skíðafélag Akureyrar lagt til fagþekkingu og mannskap. Næstu skref Ljóst er að mikill áhugi er hjá ferðamönnum á Hlíðarfjalli sem áfangastað. Álagið mun halda áfram að aukast þangað til svæðið ræður ekki við eftirspurnina og kröfur notenda verða ekki uppfylltar. Því er mikilvægt er að huga rétt að allri uppbyggingu í Hlíðarfjalli og ráðast strax í heildstæða stefnumótun þar sem horft er til þess hvernig bæta megi rekstur svæðisins og þróa það í átt að sjálfbærri og tekjuberandi starfsemi. Það krefst þess að: ● Ráðist verði í heildstæða stefnumótun fyrir Hlíðarfjall ● Uppbygging verði skipulögð í skýrum og hagkvæmum áföngum ● Skíðafélag Akureyrar komi að ákvarðanatöku um framtíðarskipulag svæðisins ● Rekstrarfyrirkomulag svæðisins verði endurskoðað með það að markmiði að auka tekjur og bæta nýtingu fjármuna Ef vel er haldið á spilunum getur Hlíðarfjall orðið enn betra skíðasvæði og laðað að fleiri ferðamenn yfir tímabilið. Jafnframt eru tækifæri til að byggja upp svæðið sem öfluga miðstöð skíða- og brettaíþrótta á Íslandi til framtíðar sem þjóðarleikvangur Íslendinga. Til að fylgja þessu eftir mun Sjálfstæðisflokkurinn á Akureyri setja það í sína stefnuskrá að stofnaður verði vinnuhópur um framtíðarfyrirkomulag Hlíðarfjalls. Markmið hópsins verði að skoða hvernig Skíðafélag Akureyrar komi með formlegum hætti að rekstri, stefnumótun og þróun svæðisins þannig að fagþekking félagsins nýtist betur við ákvarðanir og uppbyggingu. Heimir Örn Árnason situr í 2. sæti á framboðslista Sjálfstæðisflokksins á Akureyri og situr í stjórn ÍSÍ Fannar Gíslason formaður Skíðafélags Akureyrar, og situr í 12. sæti á framboðslista Sjálfstæðisflokksins á Akureyri.