Hlíðarfjall hefur á undanförnum árum þróast í einn stærsta vetraráfangastað landsins. Aðsókn hefur aukist jafnt og þétt og um helgar sækja þúsundir gesta fjallið þegar best lætur. Samhliða þessu hefur starf Skíðafélags Akureyrar (SKA) vaxið hratt og iðkendafjöldi tvöfaldast á um þremur árum. Ljóst er að mikill áhugi er fyrir íþróttunum í Hlíðarfjalli og mikilvægt að innviðir og starfsemi fjallsins geti tekið á móti öllum sem vilja koma, bæði almenningi og keppnisfólki. Andrésar andar leikarnir eru stærsti einstaki viðburðurinn í starfi skíðafélagsins og einn stærsti íþróttaviðburður landsins yfir vetrartímann. Þegar 50 ára afmælisleikarnir voru haldnir dagana 22.–25. apríl, tóku tæplega 1.100 keppendur þátt og ríflega 3.500 gestir komu til Akureyrar vegna þeirra. Aldrei hafa fleiri iðkendur frá SKA tekið þátt eða 274 talsins. Þessi mikla þátttaka endurspeglar vel þann vöxt sem orðið hefur í starfsemi félagsins og skýrir að hluta til það mikla álag sem nú er á fjallinu. Í vetur hafa flestir laugardagar verið þétt setnir enda fjölskyldur iðkenda einnig virkir notendur svæðisins á æfingartímum. Mikilvægt fyrir atvinnulíf og ferðaþjónustu Hlíðarfjall gegnir mjög stóru hlutverki í vetrarferðamennsku á Akureyri og styrkir atvinnulíf bæjarins á þeim tíma árs þegar annars hægir á. Á Akureyri er öflug þjónusta til staðar, svo sem hótel, veitingastaðir, fjölbreytt afþreying og öflugt íþróttastarf. Vegna þessa hefur Hlíðarfjall mikla möguleika til frekari vaxtar sem áfangastaður.* Vetraríþróttamiðstöð Íslands er staðsett á Akureyri og var stofnuð árið 1995 með það að markmiði að efla vetraríþróttir, fræðslu og útivist. Um aldamótin studdi miðstöðin uppbyggingu í Hlíðarfjalli með fjármagni sem skilaði góðum árangri. Síðan þá hefur starfsemin að mestu legið niðri en á þessu kjörtímabili hafa verið stigin skref í átt að því að endurvekja hana. Aðkoma miðstöðvarinnar að nýju getur skipt verulegu máli fyrir frekari uppbyggingu Hlíðarfjalls, sérstaklega með því að styrkja fjárhagslegan grundvöll verkefna og gera umfangsmeiri framkvæmdir mögulegar. Með slíkum stuðningi og vel ígrunduðu framtíðarskipulagi er möguleiki að byggja Hlíðarfjall upp sem þjóðarleikvang vetraríþrótta á Íslandi þar sem aðstaða fyrir almenning og afreksstarf stenst þær kröfur sem gerðar eru til slíkra svæða. Markviss uppbygging skiptir máli Undanfarin ár hafa verið stigin mikilvæg skref í uppbyggingu í Hlíðarfjalli. Sú reynsla sýnir hins vegar að án skýrrar framtíðarsýnar verða framkvæmdir síður markvissar og dýrari en þær þurfa að vera. Mikilvægt er að fyrir liggi skýr stefna og markmið með allri uppbyggingu. Heildarsýn þarf að vera til staðar svo innviðauppbygging verði bæði hagkvæm og skynsamleg til lengri tíma. Mikilvægt er að skoða alla snertifleti sem til staðar eru áður en lagt er af stað í framkvæmdir. Samhliða því þarf að horfa til rekstrar svæðisins í heild sinni og hvernig þróa megi starfsemina þannig að Hlíðarfjall verði til framtíðar sjálfbært og tekjuberandi. Fagþekkingu skíðafélagsins þarf að nýta Skíðafélag Akureyrar hefur vaxið hratt á undanförnum árum. Tækifæri eru til frekari vaxtar en mikilvægt er að nýta þá sérþekkingu og reynslu sem félagar í Skíðafélagi Akureyrar búa að. Skíðafélagið þarf að koma með formlegum hætti að ákvörðunum um stórar framkvæmdir í Hlíðarfjalli þannig að fagþekking nýtist við undirbúning og framkvæmd þessara verkefna. Jafnframt er nauðsynlegt að bæta samþættingu milli starfsemi Hlíðarfjalls og skíðafélagsins. Með þátttöku skíðafélagsins í rekstri og þróun svæðisins má tryggja að uppbygging innviða nýtist sem bæði almenningi og íþróttastarfi sem best og leiði þannig til hagkvæmari framkvæmda. Jafnframt verður betri samþætting milli mismunandi þátta svæðisins sem stuðlar að skynsamlegri uppbyggingu og betri nýtingu fjármuna. Tækifærin eru til staðar Skíðafélag Akureyrar skilaði inn aðgerðaráætlun til umhverfis- og mannvirkjasviðs Akureyrarbæjar í janúar 2025 með það að markmiði að fjölga opnunardögum í Hlíðarfjalli að hausti til. Sumarið 2025 var byrjað að vinna eftir áætluninni og með tiltölulega litlu inngripi tókst strax að fjölga opnunardögum án þess að ráðist væri í kostnaðarsamar eða yfirgripsmiklar framkvæmdir. Í framhaldi af þessari vinnu er jafnframt hafinn undirbúningur að landmótun Hjallabrautar, sem er eitt af lykilverkefnum í fyrsta áfanga aðgerðaráætlunarinnar. Á nútíma skíðasvæðum sem taka á móti fjölskyldum er lögð áhersla á fjölbreytta afþreyingu, svo sem leikjabrautir, brettapark og aðra upplifun fyrir breiðan hóp notenda. Mikilvægt er að móta skýra stefnu um slíka uppbyggingu í Hlíðarfjalli til að bæta upplifun gesta og auka aðdráttarafl svæðisins. Þar getur Skíðafélag Akureyrar lagt til fagþekkingu og mannskap. Næstu skref Ljóst er að mikill áhugi er hjá ferðamönnum á Hlíðarfjalli sem áfangastað. Álagið mun halda áfram að aukast þangað til svæðið ræður ekki við eftirspurnina og kröfur notenda verða ekki uppfylltar. Því er mikilvægt er að huga rétt að allri uppbyggingu í Hlíðarfjalli og ráðast strax í heildstæða stefnumótun þar sem horft er til þess hvernig bæta megi rekstur svæðisins og þróa það í átt að sjálfbærri og tekjuberandi starfsemi. Það krefst þess að: ● Ráðist verði í heildstæða stefnumótun fyrir Hlíðarfjall ● Uppbygging verði skipulögð í skýrum og hagkvæmum áföngum ● Skíðafélag Akureyrar komi að ákvarðanatöku um framtíðarskipulag svæðisins ● Rekstrarfyrirkomulag svæðisins verði endurskoðað með það að markmiði að auka tekjur og bæta nýtingu fjármuna Ef vel er haldið á spilunum getur Hlíðarfjall orðið enn betra skíðasvæði og laðað að fleiri ferðamenn yfir tímabilið. Jafnframt eru tækifæri til að byggja upp svæðið sem öfluga miðstöð skíða- og brettaíþrótta á Íslandi til framtíðar sem þjóðarleikvangur Íslendinga. Til að fylgja þessu eftir mun Sjálfstæðisflokkurinn á Akureyri setja það í sína stefnuskrá að stofnaður verði vinnuhópur um framtíðarfyrirkomulag Hlíðarfjalls. Markmið hópsins verði að skoða hvernig Skíðafélag Akureyrar komi með formlegum hætti að rekstri, stefnumótun og þróun svæðisins þannig að fagþekking félagsins nýtist betur við ákvarðanir og uppbyggingu. Heimir Örn Árnason situr í 2. sæti á framboðslista Sjálfstæðisflokksins á Akureyri og situr í stjórn ÍSÍ Fannar Gíslason formaður Skíðafélags Akureyrar, og situr í 12. sæti á framboðslista Sjálfstæðisflokksins á Akureyri.

Vestan við Hagahverfi liggur eitt áhugaverðasta uppbyggingarsvæði Akureyrarbæjar til framtíðar. Þar eru raunveruleg tækifæri til að mæta vaxandi íbúðaþörf, styrkja innviði og byggja upp fjölbreytt og gott umhverfi. Staðsetningin er sterk. Svæðið tengist bæði rótgrónum íbúðahverfum og vinsælum útivistarsvæðum á borð við Kjarnaskóg og Naustaborgir. Hér er því einstakt tækifæri til að byggja upp hverfi þar sem nálægð við náttúru og þjónustu fer saman. Fjölbreytt byggð fyrir ólíkar þarfir Við viljum sjá blandaða byggð sem mætir þörfum ólíkra hópa. Þar sem getur farið saman; fjölbýli og minni íbúðir, raðhús og parhús og sérbýli á völdum svæðum. Staðsetning og stærð svæðisins Í skipulagstillögum sem varða svæðið á milli Naustahverfis og Hagahverfis, sem teygir sig inn á vesturhluta Hagahverfis eru áhugaverðir reitir (VÞ13, S24 og OP10) fyrir framtíðaruppbyggingu vestan Hagahverfis. Þar getur orðið þjónustusvæði fyrir blandaða byggð og fjölbreytt uppbygging. Til dæmis væri tilvalið að koma þar fyrir lífsgæðakjarna fyrir 60+. Háreistari byggð nær Hömrunum og svo lágreistari nær núverandi byggð. Hér væri að okkar mati tilvalið að hafa blandaða byggð með minni og stærri íbúðum þar sem stutt er í leikskóla og verslun á áðurnefndu svæði milli Naustagötu og Davíðshaga. Slík nálgun skapar fjölbreytt samfélag þar sem fólk á mismunandi æviskeiðum getur búið í sama hverfi. Þetta styrkir bæði félagsleg tengsl og stöðugleika í hverfum. Lífsgæðakjarni og þjónusta í nærumhverfi Svæðið vestan Hagahverfis býður upp á kjörið tækifæri til uppbyggingar lífsgæðakjarna fyrir eldri borgara. Þar getur búseta og þjónusta farið saman á þann hátt að styðja við sjálfstæði, öryggi og virkni. Samhliða er mikilvægt að byggja upp þjónustu sem styður við daglegt líf íbúa, svo sem leikskóla, verslun og aðra nærþjónustu. Uppbygging leikskóla á svæðinu er skref í rétta átt og sýnir að grunnurinn er þegar lagður. Skipulag sem horfir fram á veginn Akureyrarbær stendur frammi fyrir aukinni eftirspurn eftir íbúðarhúsnæði á næstu árum. Svæðið vestan Hagahverfis getur gegnt lykilhlutverki í að mæta þeirri þörf. Með markvissri skipulagsvinnu er hægt að byggja upp vistvænt og fjölskylduvænt hverfi þar sem þjónusta er í göngufæri, tenging við útivistarsvæði er sterk og innviðir nýtast vel. Það er í takt við nútíma skipulagsstefnu sem leggur áherslu á gæði, hagkvæmni og sjálfbærni. Tækifæri sem við eigum að nýta Uppbygging vestan Hagahverfis er ekki einungis verkefni um nýjar íbúðir heldur tækifæri til að móta heildstætt hverfi til framtíðar sem þjónar bæði núverandi og komandi kynslóðum. Með skýrri stefnu og markvissri skipulagsvinnu getur svæðið orðið einn helsti vaxtarpunktur Akureyrarbæjar á næstu árum. Svæðið býður upp á fjölbreytt og verðmæt tækifæri fyrir bæinn. Það er vel staðsett, í nálægð við náttúruperlur og þegar mótaða innviði, og uppbyggingin gæti orðið lykilþáttur í að mæta íbúðaþörf bæjarins. Jafnframt gefst kostur á að skapa miðstöð þjónustu og fjölbreytt búsetuúrræði, meðal annars fyrir eldri borgara. Þar má einnig þróa blandað og vistvænt hverfi sem styrkir bæjarbraginn syðst í bænum. Með áframhaldandi faglegri vinnu og markvissum aðgerðum getur svæðið vestan Hagahverfis orðið eitt áhugaverðasta og mikilvægasta uppbyggingarsvæði Akureyrar á komandi árum. Þetta er verkefni sem vert er að taka föstum tökum í þágu enn betri og öflugri framtíðar fyrir Akureyrarbæ. Það er verkefni sem við eigum að taka föstum tökum fyrir enn betri Akureyrarbæ. Þórhallur Harðarson nefndarmaður í umhverfis- og mannvirkjaráði Akureyrarbæjar og frambjóðandi í 4. sæti á lista Sjálfstæðisflokksins á Akureyri í kosningunum 16. maí

Á Akureyri standa margar fjölskyldur frammi fyrir verulegri áskorun á hverju sumri þegar sumarlokanir leikskóla standa yfir og fjölskyldur þurfa að reyna með einhverju móti að samræma atvinnu og fjölskyldulíf. Þetta fyrirkomulag reynir sérstaklega á þá sem starfa í framlínustörfum og hafa takmarkað um það að segja hvenær þeir taka sumarfrí. Leikskólasamfélagið í lykilhlutverki Leikskólastarf er krefjandi fagstarf og leikskólasamfélagið gegnir lykilhlutverki í lífi barna og fjölskyldna. Því þurfa allar hugmyndir um breytingar eða þróun að byggja á nánu samstarfi við fagaðila þ.e. leikskólakennara, stjórnendur og annað starfsfólk leikskóla. Eitt af stefnumálum Sjálfstæðisflokksins á Akureyri er að hrinda af stað þróunarverkefni í samvinnu við fagaðila til að tryggja að framlínustarfsmenn hafi sumarvistun fyrir börnin sín meðan þau standa vaktina. Raunveruleiki framlínustarfa Núverandi fyrirkomulag mætir illa þörfum margra. Álag á framlínustarfsmenn hefur verið mikið, sérstaklega innan heilbrigðiskerfisins, þar sem mönnun hefur verið mikil áskorun. Erfitt er að fá sérhæft fólk í sumarafleysingar og hefur mannekla verið áberandi. Starfsfólk vinnur á vöktum og hefur takmarkað svigrúm til að velja sér frítíma. Þá hefur Sjúkrahúsið á Akureyri óskað eftir því að sveitarfélagið taki með einhverju hætti þátt í verkefnum sem snúa að því að laða til sín sérfræðinga til svæðisins. Auk þess hefur SAk kallað eftir endurskoðun á lokunum leikskóla yfir sumartímann. Núverandi fyrirkomulag hefur einnig áhrif á aðra lykilstarfsmenn í samfélaginu okkar, s.s. lögreglu, slökkvilið og starfsmenn hjúkrunarheimilanna. Fyrir marga foreldra skapar þetta óvissu þegar kemur að umönnun barna yfir sumartímann og veldur auka álagi. Því leggur Sjálfstæðisflokkurinn áherslu á að koma af stað þróunarverkefni í samvinnu við fyrrnefnda fagaðila til að svara ákalli þeirra sem standa vaktina fyrir okkur. Réttur barna og starfsfólks til hvíldar Samhliða þessum þáttum þurfum við að gæta þess að öll börn fái lögbundið sumarfrí og tryggja sumarfrí leikskólastarfsmanna. Þessi tvö sjónarmið þurfa að haldast í hendur við verkefnið. Lausnin felst því ekki í því að fórna öðru fyrir hitt, heldur að þróa skipulag sem tekur tillit til allra. Í því samhengi er hægt að skoða, í nánu samstarfi við leikskólasamfélagið, hvort unnt sé að halda úti takmarkaðri starfsemi á sumrin sem mætir þörfum þeirra foreldra sem síst geta verið án úrræða, auk þess gæti þetta fyrirkomulag aukið val leikskólakennara um hvenær þeir taka sitt sumarfrí. Slík nálgun þyrfti að byggja á faglegu mati, samráði og sveigjanlegum lausnum, til dæmis með samnýtingu mannafla milli leikskóla og þátttöku námsmanna í uppeldisgreinum. Samfélagslegt mikilvægi Þessi áskorun snýst um það hvernig við viljum byggja upp samfélagið okkar. Hún snertir bæði velferð barna, starfsumhverfi leikskóla og getu samfélagsins til að halda uppi mikilvægum innviðum. Þegar þeir sem sinna lykilstörfum standa frammi fyrir því að geta ekki tryggt börnum sínum viðeigandi umhverfi yfir sumartímann hefur það áhrif á samfélagið okkar í heild. Sameiginlegt verkefni Verkefnið þarf að nálgast með festu, virðingu og samvinnu. Með því að hlusta á reynslu og þekkingu leikskólastarfsmanna, ásamt þörfum foreldra, er hægt að þróa raunhæfar og sanngjarnar lausnir og skoða hvernig auka megi sveigjanleika innan kerfisins. Sjálfstæðisflokkurinn á Akureyri vill leggja sitt af mörkum til slíks samtals og þróunar, með það að markmiði að styðja bæði fjölskyldur og standa vörð um grunnþjónustu í sveitarfélaginu okkar. Að tryggja börnum öruggt og gott umhverfi og foreldrum raunhæfa möguleika til að sinna störfum sínum er ekki hlunnindi, það er sameiginlegt verkefni okkar allra. Slíkt þróunarverkefni gæti því bæði stutt fjölskyldur og skapað grundvöll fyrir betra skipulagi og auknu svigrúmi fyrir alla foreldra í framtíðinni. Kristína Björk Arnórsdóttir - situr í 6. sæti á framboðslista Sjálfstæðisflokksins á Akureyri fyrir komandi bæjarstjórnarkosningar sem fara fram þann 16. maí

Með aukinni uppbyggingu í miðbæ Akureyrarbæjar, fleiri hótelum og vaxandi mannlífi er ljóst að eftirspurn eftir bílastæðum mun aukast á næstu árum. Sú þróun er jákvæð og sýnir að miðbærinn er að styrkjast sem hjarta bæjarins. Aukin umferð og fleiri gestir kalla líka á betra skipulag. Þegar erfit t er að finna stæði dregur það úr aðsókn í verslun, þjónustu og menningarlíf miðbæjarins. Ef við viljum halda miðbænum lifandi og aðgengilegum þarf að grípa til raunhæfra aðgerða sem bæta aðstöðu án þess að raska umhverfinu eða ásýnd bæjarins. Til að mæta áhyggju m íbúa, gesta og rekstraraðila af erfiðu aðgengi að bílastæðum leggjum við í Sjálfstæðisflokknum fram raunhæfa tillögu sem fjölgar bílastæðum og styður við áframhaldandi þróun mi ðbæjarins. Unnin var greining á bílastæ ðanýtingu í miðbæ Akureyrarbæjar og áhrif framkvæmda við Hofsbót og Hafnarstræti, en með uppbyggingunni má gera ráð fyrir því að eftirspurn aukist. Greiningin sýnir að þó ekki sé mikill þrýstingur til staðar núna má gera ráð fyrir því að nýting stæða á ákveðnum svæðum verði mikil og sum svæði nánast fullnýtt yfir daginn. Við ætlum að bregðast tímanlega við og tryggja nægt framboð bílastæða áðu r en þrýstingur myndast. Raunhæf lausn á góðum stað Frambjóðendur Sjálfstæðisflokksins hafa nú í fyrsta skipti ákveðið að leggja fram tillögu að uppbyggingu á bílastæðahúsi myndrænt. Tillaga Sjálfstæðisflokksins á Akureyri gengur út á að byggja þriggja hæða bílastæðahús milli Hólabrautar og Brekkugötu við Akureyrarvöll og var teiknuð af listamanninum Skvera. Þessi lausn mun bæta verulega við fjölda bílastæða á svæði sem lítið er notað í dag. Með nútímalegri hönnun er hægt að láta húsið falla vel að umhverfinu þannig það verði sny rtileg viðbót við miðbæinn.

Fyrir sveitarstjórnarkosningarnar 2022 lögðum við í Sjálfstæðisflokknum áherslu á að viðurkenna leikskólann sem fyrsta skólastigið og stíga markviss skref í átt að gjaldfrjálsri menntun frá unga aldri. Í Akureyrarbæ var farin sú leið að innleiða sex tíma gjaldfrjálsa og með því stigum við raunhæft og ábyrgt skref. Samhliða því voru teknir upp svokallaðir skráningardagar þar sem foreldrum býðst að skrá börnin sín gegn hóflegu gjaldi. Markmiðið var að bæta starfsaðstæður í leikskólum, efla fagmennsku og skapa aukinn sveigjanleika. Þessi nálgun hefur gert leikskólum kleift að dreifa álagi betur yfir daginn og árið sem hefur bein áhrif á gæði starfsins og aðstæður barna. Sem formaður fræðslu- og lýðheilsuráðs tók ég virkan þátt í því að þróa og móta þær breytingar sem tóku í gildi í janúar 2024. Starfsfólk leikskólanna sýndi breytingunum eðlilega varfærni í upphafi en með opnu og góðu samstarfi náðist að byggja upp traust og sameiginlega sýn. Það er sérstaklega ánægjulegt að sjá hversu vel hefur tekist til og hve jákvæð stemning ríkir nú hjá meirihluta starfsmanna. Árangurinn staðfestur Þá er ánægjulegt að nýleg rannsókn Önnu Elísu Hreiðarsdóttur og Svövu Bjargar Markar á breytingum á rekstrarumhverfi leikskóla á Akureyri og í Kópavogi staðfestir að sú leið sem við fórum hefur skilað raunverulegum árangri. Niðurstöður sýna að jafnvel lítil fækkun barna hluta dags sem skapast vegna breytinga á vistunartíma leiði til minna áreitis, betri mönnunar og minni streitu hjá starfsfólki, fleiri gæðastundum með börnunum og bættrar líðan barna. Höldum áfram að þróa og bæta Akureyrarleiðin er ekki fullmótuð og á ekki að vera það. Á komandi kjörtímabili er mikilvægt að efla hana enn frekar og er nauðsynlegt að hlusta á raddir starfsfólk og foreldra og þróa útfærsluna áfram. Þar er tækifæri til úrbóta. Skráningardagar hafa sannað gildi sitt og því teljum við nauðsynlegt að halda þeim til streitu með hóflegu gjaldi. Hins vegar þarf að horfa gagnrýnið á framkvæmd skráningardaga, fjölda dagana og þá sérstaklega hvað varðar skráningarfresti og notendaupplifun. Eitthvað hefur verið eftir kallað eftir auknum sveigjanleika í vistunartíma barna, til dæmis fyrir foreldra í vaktavinnu. Afar mikilvægt er að hlusta vel á sjónarmið starfsfólks og vinna náið með því að mótun lausna, þannig að hægt sé að þróa kerfið áfram á farsælan hátt og skapa sveigjanlegri nýtingu á gjaldfrjálsum tímum sem gagnast börnum, foreldrum og starfsfólki. Akureyrarleiðin virkar Kjarni málsins er þó einfaldur. Breytingarnar á Akureyri voru gerðar til að bæta aðstæður barna og starfsfólk leikskóla bæjarins. Það er ánægjulegt að rannsóknir séu farnar að sýna að þær breytingar séu að skila raunverulegum árangri. Verkefnið fram undan er að halda áfram á þeirri braut sem við erum á, þróa kerfið áfram og hlusta á þær raddir sem þekkja best til. Með því tryggjum við að leikskólinn verði áfram öflugur grunnur í lífi barna og að fagmennska og velferð verði áfram leiðarljós í allri þróun fyrir enn betri Akureyrarbæ. Heimir Örn Árnason formaður bæjarráðs og fræðslu- og lýðheilsuráðs Akureyrar og situr í 2. sæti á framboðslista Sjálfstæðisflokksins á Akureyri.

Það er orðið tímabært að stíga næstu skref í samgöngumálum landsins. Umræða um styttingu þjóðvegar milli Akureyrar og Reykjavíkur hefur staðið í meira en heila öld, en nú hafa gögnin sýnt okkur að þetta á ekki að vera draumsýn ein – þetta er nauðsyn. Akureyrarbær á að vera raunverulegur valkostur fyrir fólk og fyrirtæki. Metnaður okkar dugar ekki einn og sér, grunninnviðir í samfélaginu þurfa að styðja við vöxtinn. Öruggar samgöngur eru forsenda fyrir vexti, samkeppnishæfni og búsetugæðum. Ófullnægjandi samgöngur mega ekki vera hindrun sem hægir á uppbyggingu. Tryggjum samkeppnishæfni Í Akureyrarbæ er öflugt atvinnulíf. Til að styrkja það enn frekar þurfum við að leita leiða til að ná niður flutningskostnaði og auka samkeppnishæfni svæðisins. Flest fyrirtæki flytja vörur og sækja þjónustu milli landshluta og þá skipta vegalengdir miklu máli. Sama á við um íbúa. Flest eigum við reglulega erindi til höfuðborgarinnar, að sækja þjónustu eða heimsækja fjölskyldur og vini. Þrátt fyrir að millilandaflug um Akureyrarflugvöll hafi aukist verulega síðustu misserin, ferðast meginþorri landsmanna enn um Keflavíkurflugvöll og verðmætar útflutningsafurðir frá landsbyggðinni fer þaðan um daglega. Tryggt og reglubundið millilandaflug um Akureyrarflugvöll myndi halda eftir fleiri störfum á Eyjafjarðarsvæðinu, styrkja búsetu og auka aðdráttarafl svæðisins fyrir almenning og fyrirtæki. Styttri og öruggari leið yfir á suðvesturhornið skiptir einnig verulegu máli fyrir lífsgæði íbúa, gerir Akureyrarbæ að samkeppnishæfari búsetukosti og getur ráðið úrslitum þegar kemur að rekstrarhagkvæmni fyrirtækja og ákvörðunum um uppbyggingu þeirra. Bætt umferðaröryggi er ekki samningsatriði Öll gögn styðja við þjóðhagslega hagkvæmni og ávinning af styttingu þjóðvegar milli stærstu byggðakjarna landsins. Greiningar Vegagerðarinnar hafa meðal annars sýnt að stytting þjóðvegar milli Akureyrar og Reykjavíkur myndi bæta umferðaröryggi og skila miklum þjóðhagslegum ávinningi. Hugmyndir um styttingu hafa verið misjafnlega metnaðarfullar og væri mest hægt að ná 80 km styttingu ef lagður yrði vegur um Stórasand. Það er alvöru langtíma markmið sem við viljum stefna að. Það þarf hins vegar að byrja einhvers staðar og Húnavallaleið hefur verið í umræðunni í áratugi. Þar náum við allt að 14 km styttingu og hún er í reynd dæmi um mjög arðsama vegaframkvæmd. Sameinar styttingu, bætta vegastaðla og aukið umferðaröryggi. Daglega fara um 1.000 ökutæki um þessa leið og hafa umferðarsérfræðingar Vegagerðarinnar áætlað að samlegðaráhrif bættrar veglínu og fækkunar á tengingum á þessum vegkafla gæti fækkað slysum um 11 á ári. Slíkar framkvæmdir falla vel að markmiðum samgönguáætlana um greiðar, öruggar og hagkvæmar samgöngur. Þessu til viðbótar er nærtækt að horfa til enn frekari styttinga með lagningu Vindheimaleiðar og Sundabrautar, en með þessum framkvæmdum að auki, gæti heildar stytting orðið um 30 km - miðborga á milli. Innviðir mæti þörfum samfélagsins Í borgarstefnu stjórnvalda hefur Akureyrarbær meðal annars það hlutverk að taka við vexti og efla atvinnulíf. Slík stefna kallar á að innviðir samfélagsins, þar á meðal samgöngur, samræmist því hlutverki og mæti þörfum samfélagsins. Í nýrri samgönguáætlun Innviðaráðuneytis er áhersla lögð á kraftmiklar og arðsamar framkvæmdir um allt land sem efla umferðaröryggi, stytta tengingar milli byggða og bæta lífsgæði íbúa. Ef samgöngur við stærsta þjónustu- og markaðssvæði landsins halda aftur af atvinnuuppbyggingu og búsetu, er augljóst misræmi milli stefnu og framkvæmdar. Stytting þjóðvegar milli Akureyrar og Reykjavíkur færir landshluta nær hverjum öðrum og aukið millilandaflug um Akureyri bætir lífsgæði íbúa og rekstrarskilyrði fyrirtækja. Samgöngur á landi og í lofti er mikilvægt öryggismál, byggðamál, efnahagsmál og ekki síst mikilvægt réttlætismál fyrir landsbyggðina. Við í Sjálfstæðisflokknum ætlum að standa fyrir öflugri hagsmunabaráttu í þessu máli - fyrir enn betri Akureyrarbæ. Arna Rut Gunnarsdóttir situr í 3. sæti á framboðslista Sjálfstæðisflokksins á Akureyri Þórhallur Harðarson situr í 4. sæti á framboðslista Sjálfstæðisflokksins á Akureyri

Eldri borgarar hafa lagt grunninn að því samfélagi sem við búum við í dag. Það er einföld sannfæring mín að við eigum að mæta þeim með virðingu, hlusta á reynslu þeirra og tryggja raunveruleg lífsgæði á efri árum. Við getum gert betur og það er mín skýra stefna að gera gott enn betra. Sem nýr oddviti Sjálfstæðisflokksins á Akureyri hef ég lagt ríka áherslu á áframhaldandi gott samtal við eldri borgara. Við höfum þegar stigið stór skref í því og munum halda áfram. Reglulegt eldri borgara kaffi er hluti af því. Fyrir mér skiptir þetta máli. Ég vil heyra beint frá fólkinu sjálfu, án milliliða, hvað gengur vel og hvað þarf að bæta. Þannig tökum við betri ákvarðanir. Vinnum áfram að betri aðstöðu og öflugu félagslífi Ég tel að við þurfum að gera meira þegar kemur að aðstöðu og félagslífi. Það á að vera sjálfsagt að eldri borgarar hafi aðgang að góðum og aðgengilegum rýmum þar sem hægt er að hittast, sækja fræðslu og taka þátt í virku samfélagi og öflugu félagsstarfi. Sjálfstæðisflokkurinn á Akureyri vill styðja uppbyggingu slíkrar aðstöðu þar sem aðgengi er tryggt fyrir alla. Mikilvægt er að aðstæður útiloki ekki fólk frá þátttöku í samfélaginu. Húsnæðismál og þjónusta sem virkar Húsnæðismál vega þungt í umræðunni við eldri borgara. Við viljum sjá aukið framboð af f fjölbreyttu húsnæði fyrir eldri borgara. Fólk á að hafa raunverulegt val og geta búið sjálfstætt sem lengst. Félag eldri borgara á Akureyri hefur framkvæmt húsnæðiskönnun meðal félagsmanna sinna og niðurstöður hennar má nýta til að móta markvissa stefnu um uppbyggingu húsnæðis og þjónustu fyrir eldri borgara. Við höfum fengið kynningu á verkefni ÍBA 55+ um uppbyggingu lífsgæðakjarna og viljum tryggja að uppbygging lífsgæðakjarna fari í framkvæmd þar sem þjónusta og búseta fara saman. Á sama tíma þurfum við að tryggja úrræði fyrir þá sem þurfa meiri þjónustu. Við munum beita okkur fyrir því að hjúkrunarrýmum fjölgi, bæði til að létta álagi á Sjúkrahúsinu á Akureyri og tryggja að eldri borgarar fái viðeigandi þjónustu á réttum tíma. Það er grundvallaratriði að fólk geti elst með reisn og öryggi þegar þörfin eykst. Þá er gott skref að samstarf heimahjúkrunar Heilbrigðisstofnunar Norðurlands og heimaþjónusta A kureyrarbæjar eflist með því að færa þjónustuna undir sama þak, en það skiptir máli að hægt sé að byggja upp öfluga þjónustu á einum stað. Aðgengi óháð fjárhag Við ætlum líka að leggja áfram meiri áherslu á heilsueflingu og virkni. Verkefnið Virk efri ár verður áfram í forgangi og við viljum gera þátttöku gjaldfrjálsa til að tryggja jafnt aðgengi og hvetja til aukinnar þátttöku. Áhersla okkar er að draga úr félagslegri einangrun, bæta heilsu og efla virkni íbúa á efri árum.Það er jafnframt mikilvægt fyrir okkur að gjaldtaka fyrir þjónustuna sé sanngjörn. Kostnaður við heimaþjónustu, heimsendan mat eða þjónustu í félagsaðstöðu á ekki að vera hindrun. Allar hækkanir verða að skoðast í því samhengi og við eigum að standa vörð um aðgengi óháð fjárhag. Jafnframt höfum við lagt áherslu á að hrinda í framkvæmd tekjutengdum lýðheilsustyrk fyrir eldri borgara. Með honum viljum við tryggja að allir hafi raunhæfan aðgang að heilsueflandi tækifærum, óháð efnahag. Með þessum aðgerðum styðjum við við virkt og heilbrigt líf á efri árum. Við hlustum og framkvæmum svo Við í Sjálfstæðisflokknum stefnum á að halda fleiri eldri borgara kaffi fyrir kosningarnar í vor, með mismunandi áherslum að hverju sinni. Næsta kaffi verður á morgun, laugardaginn 25. apríl, klukkan 10 á kosningaskrifstofunni okkar að Furuvöllum 5. Þá ætlum við að halda samtalinu gangandi áfram yfir allt kjörtímabilið framundan. Fyrir mér snýst þetta um virðingu í verki. Að hlusta, bregðast við og byggja upp samfélag þar sem eldri borgarar finna að þeirra framlag skiptir máli. Það er verkefni sem ég tek alvarlega. Fyrir enn betri Akureyrarbæ . Berglind Ósk Guðmundsdóttir oddviti Sjálfstæðisflokksins á Akureyri í bæjarstjórnarkosningum sem fara fram 16. maí næstkomandi.

Í upphafi kjörtímabilsins byrjaði ég strax að beita mér fyrir því að allir grunnskólar Akureyrarbæjar tækju upp samræmdar símareglur. Ég taldi mikilvægt að skapa skýran ramma um notkun snjallsíma í skólum til að stuðla að betra skólaumhverfi, meiri einbeitingu í kennslu og auknum samskiptum milli nemenda. Ég viðraði þessar hugmyndir á fyrstu mánuðum skólaársins 2022 við sviðstjóra fræðslu- og lýðheilsusviðs og skólastjórnendur grunnskóla Akureyrarbæjar. Við tók afar góð vinna hjá starfshópi árið 2023 en hann var samsettur af kjörnum fulltrúum, fulltrúum foreldra og ungmenna, starfsfólki skóla og starfsfólki af fræðslu- og lýðheilsusviði. Hópurinn vann að því að skoða kosti og galla samræmdra símareglna og símafrís í grunnskólum. Hópurinn átti samráð við foreldra, starfsfólk skóla og nemendur með fjölbreyttum hætti. Í kjölfarið tók símafrí í grunnskólum Akureyrarbæjar gildi í ágúst 2024. Meiri vinnufriður og virkari þátttaka í námi Nú eru liðin tæplega tvö ár frá því að samræmdar símareglur voru innleiddar í grunnskólum Akureyrarbæjar. Markmiðið með reglunum var að skapa betra námsumhverfi, bæta samskipti og auka vellíðan nemenda og starfsfólks. Þegar litið er til baka má sjá að þessi ákvörðun hefur haft margvísleg jákvæð áhrif á skólastarfið. Á þessum tveimur árum hefur vinnufriður í kennslustundum aukist. Kennarar hafa greint frá því að nemendur eigi auðveldara með að einbeita sér og taki virkari þátt í náminu þegar símar eru ekki til staðar sem truflun. Einnig hefur komið fram að nemendur klára verkefni sín betur og sýna meiri áhuga á kennslunni. Fleiri leikir og sterkari samskipti nemenda Í frímínútum hefur einnig orðið jákvæð breyting. Nemendur verja meiri tíma í samskipti sín á milli og taka þátt í leikjum og sameiginlegri afþreyingu. Margar skólalóðir hafa verið þróaðar áfram með nýjum leik- og afþreyingar möguleikum til að mæta þörfum nemenda. Þetta hefur stuðlað að aukinni gleði og betri samskiptum í nemendahópnum. Foreldrar mikilvægir þátttakendur Samstarf við foreldra hefur einnig verið mjög mikilvægt á þessum tíma. Foreldrar hafa almennt verið mjög ánægðir með símafríið og tekið vel í reglurnar. Margir telja að breytingin hafi haft jákvæð áhrif á börnin, bæði hvað varðar einbeitingu, samskipti og líðan í skólanum. Með þessu mun vonandi skapast enn betri og meiri sameiginleg sýn milli heimila og skóla á mikilvægi hóflegrar símanotkunar og heilbrigðra samskipta. Mikilvægt að fylgjast áfram með og þróa reglurnar Þrátt fyrir jákvæðar niðurstöður hefur verið mikilvægt að fylgjast vel með þróuninni og hlusta á ábendingar frá nemendum og starfsfólki. Reglurnar verða að vera endurskoðaðar reglulega til að tryggja að þær þjóni þörfum skólasamfélagsins sem best. Einnig hefur á kjörtímabilinu verið lögð áhersla á fræðslu um netöryggi og ábyrga notkun snjalltækja og mikilvægt er að halda því áfram. Að lokum má segja að símafrí í grunnskólum Akureyrarbæjar hafi reynst mikilvægt skref í átt að betra skólastarfi. Reynslan síðustu tveggja ára sýnir að með góðu samstarfi nemenda, foreldra og starfsfólks er hægt að skapa jákvætt og uppbyggilegt skólaumhverfi þar sem vellíðan og nám fara saman. Markmiðið áfram er að þróa skólastarfið og tryggja að nemendur fái sem besta aðstöðu til náms og félagslegra samskipta. Heimir Örn Árnason formaður bæjaráðs og fræðslu- og lýðheilsuráðs Akureyrarbæjar og situr í 2. sæti á framboðslista Sjálfstæðisflokksins á Akureyri

Sjálfstæðisflokkurinn á Akureyri vill halda áfram að byggja upp enn betra samfélag til framtíðar, þar sem ábyrg fjármál, öflugt atvinnulíf og sterk þjónusta mynda grunn að góðum lífsgæðum fyrir alla. Á kjörtímabilinu hefur verið unnið mikið og hratt. Uppbygging hefur aukist, þjónusta verið styrkt og rekstur bæjarins er orðinn traustari. Fjármálin standa sterkari stoðum en áður og við það hefur skapast svigrúm til að taka skynsamlegar ákvarðanir til framtíðar. Það er ekki sjálfgefið. Það er árangur af ábyrgum rekstri og skýrri forgangsröðun. Við vitum þó að fyrir íbúa snýst þetta ekki bara um tölur eða kerfi. Þetta snýst einfaldlega um daglegt líf. Að hér séu leikskólapláss þegar fæðingarorlofi lýkur, að börn hljóti góða menntun, að hér sé öruggt húsnæði og atvinnutækifæri og að eldri borgarar og viðkvæmir hópar fái þjónustu sem styður við sjálfstæði og lífsgæði. Að snjórinn sé mokaður og ruslið sótt. Þetta snýst um að fjölskyldur nái endum saman og að fólk geti séð sér bjarta framtíð hér í Akureyrarbæ. Við getum öll verið sammála um ákveðin grundvallargildi. Hér er gott samfélag sem við viljum styrkja. En þó grunnurinn sé sterkur finnum við líka að það eru verkefni fram undan sem við þurfum að takast á við. Vexti fylgja áskoranir Atvinnutækifærum hefur ekki fjölgað í takt við möguleika bæjarins. Við þurfum að laða að fleiri fyrirtæki og fjölbreyttari störf, ekki síst vel launuð störf sem styrkja tekjugrunninn til lengri tíma. Húsnæðismarkaðurinn er undir þrýstingi og of margir, sérstaklega ungt fólk, eiga erfitt með að komast inn á markaðinn. Á sama tíma vantar fjölbreyttari búsetuúrræði fyrir eldri borgara. Þá er ljóst að skipulag og ferlar taka oft langan tíma, sem hefur bein áhrif á bæði húsnæðisverð og atvinnuuppbyggingu. Með vexti bæjarins eykst álag á mikilvægar stoðir eins og leik- og grunnskóla. Það kallar á skýr viðbrögð og góðan undirbúning. Þetta eru áskoranir sem við þurfum að takast á við af festu og skýrri framtíðarsýn. Munurinn liggur í því hvernig við nálgumst þær. Margir tala um svipuð markmið. En það sem skiptir máli er hverjir hafa getu og vilja til að framkvæma. Við höfum sýnt að við getum tekið á erfiðum málum, bætt rekstur og skapað grundvöll fyrir áframhaldandi kröftuga uppbyggingu og við ætlum að nýta þann sterka grunn. Fyrir stórhuga vöxt Við viljum fara þá leið sem skilar raunverulegum árangri. Við ætlum að bæta samkeppnishæfni atvinnulífsins með lægri álögum, auknu framboði atvinnulóða og hraðari afgreiðslu leyfa. Með því að standa með atvinnulífinu styrkjum við tekjugrunn bæjarins sem gefur okkur svigrúm til að lækka áfram álögur og bæta þjónustu. Við viljum að fleiri geti komist í eigið húsnæði og festi rætur hér. Við munum leita leiða til að hraða skipulagsferlum og tryggja að nægt framboð íbúðarhúsnæðis sé til staðar, fyrir fyrstu kaupendur, fjölskyldur og eldri borgara. Með því getum við náð betra jafnvægi á húsnæðismarkaði og lækkað þrýsting á verði. Við viljum einfalda þjónustuna svo fólk geti klárað sín mál hratt og án óþarfa flækjustigs. Þða þýðir að halda áfram að nýta stafrænar lausnir og einfalda ferla til að bæta þjónustu og draga úr kostnaði svo meira fari í það sem skiptir raunverulega máli fyrir íbúa. Að fólk geti sótt alla þjónustu við bæinn á einum stað. Við teljum mikilvægt að hugsa til framtíðar og efla tengsl við atvinnulíf og framhaldsmenntun, sérstaklega Háskólann á Akureyri, til að skapa fleiri tækifæri fyrir ungt fólk og styrkja nýsköpun í bænum. Sterkari rödd Akureyrarbæjar Uppbygging bæjarins snýst ekki bara um ákvarðanir innan sveitarfélagsins. Hún snýst líka um það hvernig við stöndum vörð um hagsmuni Akureyrarbæjar á landsvísu. Akureyrarbær gegnir lykilhlutverki sem þjónustu-, mennta- og atvinnumiðja fyrir allt Norðurland. Það kallar á skýra og öfluga hagsmunagæslu gagnvart ríkinu. Við ætlum að slá skjaldborg um innviði og stofnanir bæjarins, þrýsta á að opinber störf og þjónusta dreifist með sanngjörnum hætti um landið. Það þýðir að standa vörð um Sjúkrahúsið á Akureyri, efla framhaldsskólana og háskólann og sækja ný verkefni og störf til bæjarins. Samgöngur eru þar lykilatriði. Við þurfum öruggari og hraðari tengingar við höfuðborgarsvæðið og áreiðanlegar flugsamgöngur. Það skiptir máli fyrir bæði íbúa og atvinnulíf. Með markvissri hagsmunagæslu getum við styrkt stöðu Akureyrarbæjar, skapað fleiri tækifæri og tryggt að bærinn haldi áfram að vaxa sem öflug miðja mannlífs og atvinnu á Norðurlandi. Fyrir hlýtt samfélag En uppbygging snýst ekki bara um innviði og atvinnu, hún snýst fyrst og fremst um fólkið. Menntakerfið er þar í lykilhlutverki. Við viljum að hvert barn fái raunveruleg tækifæri til að ná árangri, bæði í námi og líðan. Þar gegnir fagfólk lykilhlutverki. Allt það frábæra fólk sem starfar í leik- og grunnskólunum okkar sinnir ómetanlegu starfi á hverjum degi og á skilið bæði traust og stuðning. Við ætlum að efla umgjörð skólastarfs, auka valfrelsi og tryggja að aðstæður séu í takt við þarfir barna og starfsfólks. Samhliða því ætlum við að halda áfram uppbyggingu nýrra skólamannvirkja til að mæta stækkandi samfélagi og tryggja að börn fái notið nútímalegrar og góðrar aðstöðu til náms og þroska. Velferðarþjónustan er ekki síður mikilvæg. Við viljum samfélag þar sem fólk fær stuðning þegar á þarf að halda, á einfaldan og aðgengilegan hátt. Við höfum nálgast málefni eldri borgara af krafti á kjörtímabilinu og viljum gera enn betur. Eldri kynslóðir eiga að geta lifað með reisn, öryggi og virkni, með fjölbreyttum búsetukostum og þjónustu sem tekur mið af þörfum þeirra. Við viljum líka standa vel við bakið á þeim sem standa höllum fæti. Tryggja að fatlað fólk og aðrir viðkvæmir hópar hafi raunveruleg tækifæri til sjálfstæðrar búsetu og virkrar þátttöku í samfélaginu. Fyrir okkur snýst þetta allt um jafnvægi. Að byggja upp öflugt samfélag þar sem framfarir, öflugt atvinnulíf og vöxtur fara saman við umhyggju og ábyrgð. Fyrir enn meiri lífsgæði Það verður líka að vera gaman að búa í Akureyrarbæ. Við ætlum halda áfram að byggja upp gott samfélag þar sem lífsgæði eru í forgrunni: öflugt skólastarf, gott aðgengi að íþróttum og tómstundum, blómlegt menningarlíf, sterk velferðarþjónusta og bæjarumhverfi sem er hreint, snyrtilegt og lifandi. Akureyrarbær hefur alla burði til að verða enn eftirsóknarverðari valkostur til búsetu og enn öflugri staður til að reka fyrirtæki. En það gerist ekki af sjálfu sér. Það krefst ábyrgðar, skýrra ákvarðana og þess að hlutirnir séu framkvæmdir, ekki bara ræddir. Það er þar sem við stöndum. Við viljum halda áfram að vinna í þágu ykkar, byggja upp og skila árangri. Fyrir enn betri Akureyrarbæ. Hægt er að lesa ítarlega um stefnumál Sjálfstæðisflokksins á Akureyri fyrir komandi kjörtímabil hér á íslendingur.is Berglind Ósk Guðmundsdóttir oddviti Sjálfstæðisflokksins á Akureyri í bæjarstjórnarkosningum 16. maí nk.