Breytingartillaga við fjárhagsáætlun Akureyrarbæjar

Gunnar Gíslason, Eva Hrund Einarsdóttir og Njáll Trausti Friðbertsson, bæjarfulltrúar Sjálfstæðisflokksins á Akureyri, leggja fram breytingartillögu við  framkvæmdaáætlun Aðalsjóðs, er hún verður tekin fyrir í umræðu um  fjárhagsáætlun Akureyrarbæjar í bæjarstjórn í dag. Hér má lesa tillöguna:

"Við leggjum til að inn í áætlunina komi aftur framkvæmdir við Hlíð, þ.e. endurbætur á Furu- og Víðihlíð. Við teljum þessar endurbætur nauðsynlegar til þess að bæta aðstöðu, aðbúnað og öryggi aldraðra sem dvelja á þessum deildum. Er þá t.d. horft til brunavarna. Þá liggur fyrir að samþykkt framlag úr Framkvæmdasjóði aldraðra að upphæð 52 milljónir króna fellur niður ef ekki verður farið í þessar framkvæmdir á árinu 2016 og ekkert liggur fyrir um að hvenær það fengist samþykkt aftur.

Gert er ráð fyrir því að Akureyrarbær leggi fram 78 milljónir á árinu 2016 og 72 milljónir árið 2018 að því gefnu að sótt verði um framlag úr Framkvæmdasjóði aldraðra að 48 milljónir sem er 40% af framkvæmdakostnaði það ár.

Hér er um að ræða breytingar á fasteign sem verður án efa nýtt til reksturs öldrunarheimilis óháð rekstraraðila í framtíðinni. Það er því ekki hægt að sjá annað en að fjárfestingin skili sér alltaf til baka í formi leigutekna.

Við leggjum til að framkvæmdum við lóð Naustaskóla verði lokið á árinu 2016 en ekki 2017. Þar með verði framkvæmdum við Naustaskóla lokið á árinu 2016, á áttunda starfsári skólans. Áætlaður kostnaður er 100 milljónir.

Við leggjum til að fjármagn til endurnýjunar og enduruppbyggingar á Listasafninu verði lækkað í áætluninni. Til breytinga á núverandi húsnæði verði varið 100 milljónum á árinu 2016 til þess að bæta aðgengi og öryggi s.s. brunavarnir. Öðrum framkvæmdum verði slegið á frest þannig að til framkvæmda verði varið 100 milljónum árið 2019.

Í heild verði því varið 200 milljónum á þessu tímabili til Listasafnsins. Þetta þýðir það að við leggjum til að þær hugmyndir sem kynntar hafa verið um uppbyggingu Listasafnsins verði ræddar á pólitískum vettvangi t.d. hvort tengja eigi Ketilhúsið við Listasafnið með tveggja hæða tengibyggingu eins og gert er ráð fyrir í hugmyndum sem verkefnislið er að vinna með.

Við leggjum til að byggingu samgöngumiðstöðvar verði slegið á frest og fjármunir sem áætlaðir voru til verksins árin 2016 og 2017 færist til áranna 2018 og 2019.

Þessar breytingar hafa það í för með sér að heildarkostnaður við framkvæmdir Aðalsjóðs lækkar um 182 milljónir á tímabilinu 2016 – 2019. Þá breytast kostnaðartölur einstök ár sem hér segir (allar tölur í þús. kr.):