Stefnuskrá kynnt - ný útgáfa Íslendings

Stefnuskrá Sjálfstæðisflokksins á Akureyri var kynnt á kosningaskrifstofunni í dag. Þar var einnig sett í loftið ný heimasíða Íslendings, vefrits Sjálfstæðisflokksins á Akureyri. Vefurinn verður áfram með sama hætti, byggist á fréttum úr flokksstarfinu og greinaskrifum sjálfstæðisfólks, eins og hefur verið alla tíð síðan vefritið hóf göngu sína árið 2001.

Stefnuskrá framboðsins er metnaðarfull, öflug og traust. Stefnuskráin var unnin með þátttöku vel á þriðja hundrað Akureyringa. Eftir að framboðslistinn var samþykktur í fulltrúaráði sjálfstæðisfélaganna á Akureyri í marsbyrjun hófst stefnumótunarferlið. Haldnir voru fjölmargir fundir í rýnihópum og með stjórnum sjálfstæðisfélaganna á Akureyri, svo var haldinn opinn vinnufundur í Brekkuskóla 3. apríl.

Því næst fóru frambjóðendur í gönguferðir í öllum hverfum bæjarins, ræddu við íbúa og tóku stöðuna með hverfisnefndunum. Síðan hafa frambjóðendur lagt lokahönd á verkið og kallað eftir skoðunum sem flestra við það verk. Stefnuskráin endurspeglar því skoðanir fjölmargra Akureyringa, sem vilja breytingar og ný tækifæri í bæjarmálum. Stefnuskráin er nú aðgengileg hér á vefritinu.

Eins og fyrr segir fer nú nýr Íslendingur af stað á Netinu. Vefurinn hefur verið lykilþáttur í starfi Sjálfstæðisflokksins á Akureyri frá því hann fór af stað á afmæli gamla Íslendings, 9. apríl 2001. Mikill metnaður einkenndi þá ákvörðun að opna vefinn. Íslendingur.is var fyrsti flokksvefurinn á netinu hér á Akureyri og var vel uppfærður og sinnt af mikilli elju. Íslendingur varð strax frá upphafi ein öflugasta vefsíða sjálfstæðismanna á landinu - þar voru í senn nýjustu fréttirnar úr flokksstarfinu, pistlar og greinar flokksmanna og allt sem máli skipti fyrir okkur sem styðjum flokkinn.

Mikil gæfa var fyrir Sjálfstæðisflokkinn á Akureyri að fá Helga Vilberg til að stýra vefnum í upphafi. Hann var faðir vefritsins, hafði mikinn áhuga og metnað fyrir tæknihlið vefsins og þeirri umgjörð að hafa hann líflegan, ferskan og ábyrgan miðil upplýsinga og skoðana. Stjórn Sjálfstæðisfélags Akureyrar, með Helga sem formann, ýtti þessu verkefni úr vör af miklum krafti og framsýni. Það ber að þakka þeim sem þá skipuðu stjórn félagsins fyrir að opna vefinn af svo miklum metnað á þeim tímapunkti.

Ég hef komið að starfi vefritsins Íslendings nær frá upphafi, um tíma sem aðstoðarritstjóri við hlið Helga Vilberg, og naut þess að finna áhugann og kraftinn í öllu starfinu kringum vefinn. Ég hef alla tíð verið mikill áhugamaður um netið og skoðanaskipti þar. Því hef ég metið þennan vef mikils og tel heiður að hafa fengið að taka þátt í þessu verkefni gegnum árin. Helgi Vilberg á mikið hrós og heiður skilið frá okkur fyrir að hafa stýrt þessum vef af svo miklum krafti. Hann lagði mikið af mörkum til að vefurinn myndi njóta sín sem traustur miðill upplýsinga og skoðana. Sú vinna var mikils virði.

Ég hef nú stýrt vefritinu í fjögur ár, allt frá árinu 2010. Frá upphafi hef ég einsett mér að félagsmenn sjái á vefnum allt sem er að gerast, geti þar bæði kynnt sér viðburði, lesið skoðanir forystufólks okkar og sjá kraft í starfinu þar. Einnig vil ég endilega fá ábendingar um efnistök og efni til birtingar - heyra ykkar skoðanir varðandi flokksstarfið. Uppfærslur á Íslendingi hafa verið tíðar á þeim tíma sem ég hef ritstýrt honum og við höfum reynt að tryggja öfluga miðlun upplýsinga í flokksstarfinu.

Ég trúi því og treysti að framtíð vefsins sé björt. Það er lykilatriði fyrir okkur sjálfstæðisfólk á Akureyri að rækta þennan miðil upplýsinga og skoðana. Ég vil stuðla að því og bæði trúi því og treysti að við séum öll sammála um það. Við getum öll verið stolt af nýja vefnum og horfum jákvæð til kosninga - markmiðið er skýrt. Tryggjum glæsilega kosningu Sjálfstæðisflokksins í bæjarstjórn Akureyrar laugardaginn 31 maí og sjálfstæðisfólk fái stuðning til að stýra bænum af myndarskap.