Jens Garðar Helgason alþingismaður
Jens Garðar er fæddur á Eskifirði 15. desember 1976 og ólst þar upp. Jens fluttist til Akureyrar árið 1992 og hóf nám við Menntaskólann á Akureyri, þaðan sem hann útskrifaðist árið 1996. Jens Garðar stundaði nám við viðskiptafræði í Háskóla Íslands 1997-2000 og hefur MBA-gráðu frá Norwegian School of Economics.
Jens Garðar fluttist aftur til Eskifjarðar árið 2001 og starfaði sem framkvæmdastjóri Fiskimiða ehf, útflutningsfyrirtækis á fiskimjöli og lýsi, 2002-2018, var framkvæmdastjóri Fiskeldisfyrirtækisins Laxa 2018-2024 og aðstoðarforstjóri Kaldvíkur 2024.
Jens Garðar sat í bæjarstjórn Fjarðabyggðar 2006-2022, var oddviti Sjálfstæðisflokksins í Fjarðabyggð 2010-2020 og formaður bæjarráðs Fjarðabyggðar 2010-2018. Jens Garðar var formaður sveitarstjórnarráðs Sjálfstæðisflokksins 2018-2022 og formaður fjármálaráðs Sjálfstæðisflokksins 2022-2024. Hann var formaður Samtaka fyrirtækja í sjávarútvegi á árunum 2014-2020 og varaformaður Samtaka atvinnulífsins 2017-2020.
Jens var um árabil ritari sóknarnefndar Eskifjarðarkirkju, sat í stjórn Hollvinasamtaka Fjórðungssjúkrahússins á Neskaupstað, formaður Sjómannadagsráðs Eskifjarðar og í stjórn Sjóminjasafns Eskifjarðar. Jens Garðar var varaþingmaður Sjálfstæðisflokksins í Norðausturkjördæmi 2010-2016.
Jens Garðar hefur átt sæti á Alþingi og verið oddviti Sjálfstæðisflokksins í Norðausturkjördæmi frá árinu 2024 og setið í umhverfis- og samgöngunefnd Alþingis frá 2025.
Eiginkona Jens Garðars er Kristín Lilja Eyglóardóttir. Hann á þrjú börn: Heklu Björk, Thor og Vögg, með fyrrum eiginkonu sinni, Ernu Þorsteinsdóttur.
Njáll Trausti Friðbertsson alþingismaður
Njáll Trausti er fæddur í Reykjavík 31. desember 1969 og uppalinn á Seltjarnarnesi. Hann útskrifaðist frá Menntaskólanum í Reykjavík 1990 og útskrifaðist sem viðskiptafræðingur frá Háskólanum á Akureyri 2004. Veturinn 1987-1988 var Njáll skiptinemi í Delaware í Bandaríkjunum.
Njáll Trausti hefur starfað í flugturninum á Akureyri sem flugumferðarstjóri frá árinu 1991. Hann stóð ásamt fleirum að stofnun Hjartans í Vatnsmýri, sem safnaði 70.000 undirskriftum til stuðnings Reykjavíkurflugvelli, árið 2013 og er annar formanna þess.
Njáll Trausti var bæjarfulltrúi Sjálfstæðisflokksins á Akureyri 2014-2017 og varabæjarfulltrúi 2010-2014. Njáll Trausti sat í framkvæmdaráði Akureyrarbæjar 2010-2017 og í stjórn Norðurorku 2011-2017. Njáll Trausti var formaður Sjálfstæðisfélags Akureyrar og varaformaður fulltrúaráðs 2012-2014. Hann sat í umhverfis- og samgöngunefnd Sjálfstæðisflokksins, kjörinn á landsfundi, 2012-2018.
Njáll Trausti hefur setið á Alþingi frá árinu 2016. Hann situr í atvinnuveganefnd og velferðarnefnd. Hann var formaður fjárlaganefndar 2024, formaður Íslandsdeildar Nató-þingsins 2017-2024 og sat í umhverfis- og samgöngunefnd 2021-2024.
Hann sat í utanríkismálanefnd 2020-2023 (varaformaður lengst af þeim tíma), í fjárlaganefnd 2017-2020 og aftur 2023-2024 (varaformaður 2023-2024 og varamaður í nefndinni 2020-2023), í atvinnuveganefnd 2017-2021, í stjórnskipunar- og eftirlitsnefnd, í Íslandsdeild vestnorræna ráðsins og Íslandsdeild þingmannaráðstefnunnar um norðurskautsmál 2017.
Á þingferli sínum hefur Njáll Trausti leitt starfshóp um skosku leiðina í innanlandsfluginu og alþjóðaflugvallakerfið, verið varaformaður vísinda- og tækninefndar Nató-þingsins og setið t.d. í starfshóp um orkustefnu, Norðurslóðastefnu og framtíðarnefnd forsætisráðherra.
Njáll hefur tekið virkan þátt í félagsstörfum og meðal annars verið formaður Góðvina Háskólans á Akureyri. Njáll hefur verið virkur þátttakandi í starfi Round Table um árabil og sinnt þar ýmsum trúnaðarstörfum og t.d. verið landsforseti Round Table á Íslandi.
Njáll Trausti er kvæntur Guðrúnu Gyðu Hauksdóttur, hjúkrunarfræðingi, og eiga þau tvo syni; Stefán Trausta og Patrek Atla, og eitt barnabarn; Elenu.