Velkomin

Málfundafélagið Sleipnir heldur umræðufund í Geislagötu 5 laugardaginn 12. september kl. 10:00. Njáll Trausti Friðbertsson, alþingismaður, flytur framsögu og svarar fyrirspurnum. Rætt um stöðuna í pólitíkinni; fjárlagafrumvarpið, niðurstöðu þjóðaratkvæðagreiðslu um ESB, samgöngu- og byggðamál, og öryggis- og varnarmál - helstu málin í umræðunni nú við byrjun þingstarfa í vikunni. Njáll Trausti situr í fjárlaganefnd þingsins og er varaformaður Íslandsdeildar Nató-þingsins. Fundarstjóri: Stefán Friðrik Stefánsson, formaður Sleipnis. Allir velkomnir - heitt á könnunni

Það verður erfiðara með hverjum deginum sem líður að fylgjast með ríkisstjórn Kristrúnar Frostadóttur hækka álögur á fólk og fyrirtæki og boða enn frekari hækkanir í nýjum fjárlögum. Oftar en ekki hafa það verið álögur sem hæglega má kalla landsbyggðarskatta þar sem þeir eiga það til að leggjast þyngra á fólk og fyrirtæki utan höfuðborgarsvæðisins. Ríkisstjórnin hefur nú þegar meðal annars hækkað vörugjöld af ökutækjum, lagt á kílómetragjald á ökutæki sem ganga fyrir jarðefnaeldsneyti og hækkað gjaldskrár um allt að tugi prósenta. Allt eru þetta breytingar á álögum sem koma einstaklega illa við heimilin og fyrirtækin í landinu og kynda verðbólgubálið. En ríkisstjórnin er hvergi hætt og nú á að tækla ferðaþjónustuna. Stjórnin ætlar, þvert á gefin loforð, að hækka virðisaukaskatt á baðlón og taka upp nýtt gjald fyrir aðgang ferðamanna að náttúruperlum Íslands. Rétt er að benda á þá staðreynd að velflest baðlón eru staðsett á landsbyggðinni og þeir ferðamannastaðir sem munu verða fyrir barðinu á aukinni gjaldtöku sömuleiðis. Mikið undir í einstökum sveitarfélögum Í ferðaþjónustu starfar um 31 þúsund manns um landið allt og tæplega helmingur þeirra er búsettur á landsbyggðinni. Ferðaþjónusta er ein mikilvægasta atvinnugrein hinna dreifðu byggða og hefur í raun reynst ein farsælasta byggðastefna lýðveldisins fyrr og síðar. Ef ríkisstjórnin fer sínu fram má vera ljóst að hrikta tekur verulega í stoðum ferðaþjónustunnar hringinn í kringum landið og störfum verður teflt í tvísýnu. Margt má segja um ferðaþjónustuna líkt og aðrar atvinnugreinar en ljóst er að þjónusta við ferðamenn skapar störf. Í kjördæmi undirritaðs eru til að mynda fjögur baðlón, 20 milljarða fjárfesting, sem skapa um 150 heilsársstörf og þá eru ótalin öll þau afleiddu störf sem fylgja með. Þessari starfsemi má ekki taka sem sjálfsögðum hlut. Þess þá heldur þeirri staðreynd að baðlón spila lykilhlutverk í virðiskeðju ferðaþjónustunnar, skapa áfangastaðnum Íslandi einstaka sérstöðu á heimsvísu og eru þess eðlis að ferðamenn dvelja lengur í viðkomandi sveitarfélagi eða landshluta þar sem starfsemi þeirra fer fram. Þau eru ekki aðeins vinsælasta afþreying ferðamanna sem sækja Ísland heim heldur einnig meðal heimamanna og þeirra Íslendinga sem ferðast innanlands. Varnaðarorð virt að vettugi Það styttist í að þingheimur komi saman og fjárlög fyrir árið 2027 verði birt. Engin merki eru um að ríkisstjórnin ætli sér að hverfa frá auknum álögum á ferðaþjónustuna. Þvert á móti er fjármála- og efnahagsráðherra nú farinn að reyna að réttlæta hækkun virðisaukaskattsins opinberlega. Þegar virðisaukaskattshækkunin var kynnt í vor gerðu meðal annarra Vök Baths við Urriðavatn á Austurlandi alvarlegar athugasemdir við áformin. Enda er raunveruleikinn sá að verði þau að veruleika er líklegra en ekki að loka þurfi baðlóninu yfir erfiðustu vetrarmánuðina. Þessi varnaðarorð hafa hingað til verið virt að vettugi og landsbyggðarþingmenn stjórnarmeirihlutans virðast ætla að láta enn einn landsbyggðarskattinn yfir sig ganga eins og ekkert sé sjálfsagðara. Það virðist engu máli skipta þó störf í þeirra heimabyggð verði undir. Það er ekki mikil reisn yfir því að vera nytsamur meinleysingi í tannhjóli ríkisstjórnar sem grefur undan atvinnuöryggi og drepur í dróma frumkvæði og nýsköpun í heimabyggð. Jens Garðar Helgason varaformaður Sjálfstæðisflokksins

Laugardagsfundur með Berglindi Ósk Guðmundsdóttir, bæjarstjóra á Akureyri, verður haldinn í Geislagötu 5 laugardaginn 5. september kl. 10:00. Berglind Ósk ræðir um bæjarmálin, fyrstu 100 dagana í starfi sínu sem bæjarstjóri, haustið framundan og svarar fyrirspurnum. Allir velkomnir - heitt á könnunni