Fjölmennt og vel heppnað Bæjarþing Sjálfstæðisflokksins á Akureyri

Bæjarþing Sjálfstæðisflokksins á Akureyri var haldið á Múlaberg á Hótel KEA í gær. Sjálfstæðismenn fjölmenntu til að ræða málefni bæjarins og var unnin þar vinna sem verður flokknum mikilvæg á komandi árum og í aðdraganda bæjarstjórnarkosninga 16. maí næstkomandi. 

Á þinginu voru málefnum skipt í 5 flokka, fjármál og atvinnumál, menntamál, skipulags og umhverfismál, velferðarmál og önnur mál. Í hverjum flokki fyrir sig gafst fólki tækifæri til að tjá sínar skoðanir á málaflokknum og koma með hugmyndir. Allt var þetta svo gert upp á fundinum og fer í frekari vinnu hjá stjórnum félaganna.

Fundarstjóri var Ármann Kr. Ólafsson, fyrrum bæjarstjóri í Kópavogi. Í upphafi fundar las Ármann upp minningarorð um Halldór Blöndal, fyrrum ráðherra og forseta Alþingis, sem birtust á Íslendingi þegar hann lést í desember sl. og kryddaði frásögnina með sögum frá samstarfi þeirra úr kosningabaráttunni 1995 og þegar hann var aðstoðarmaður Halldórs. Fundarmenn risu úr sætum Halldóri til heiðurs.

Á föstudagskvöldið var haldinn vel heppnaður hittingur með Jens Garðari Helgasyni, varaformanni Sjálfstæðisflokksins og oddvita flokksins í kjördæminu, í nýjum og glæsilegum sal á Hótel Akureyri, Lóni. Hótelið var valin glæsilegasta nýbygging liðins árs og skal engan undra, sérlega vel heppnuð uppbygging.

Næsta skref í aðdraganda kosninga er val á lista flokksins og hefur fulltrúaráð flokksins ákveðið að fari fram röðun í efstu fjögur sætin. Röðun fer fram laugardaginn 7. febrúar og eru sem flestir hvattir til að bjóða sig fram. 

Umfjöllun um Bæjarþingið og fleiri myndir frá deginum