Við áramót 2025

Ég vil byrja á framtíðinni. Trú mín er sú að Ísland geti á næstu árum byggt samfélag sem stendur traustum fótum, þar sem dugnaður og ábyrgð eru metin að verðleikum. Ungt fólk á að sjá framtíð hér heima vegna þess að tækifærin eru raunveruleg og sanngjörn. Fjölskyldur eiga að geta treyst því að launin dugi fyrir heimili og daglegum útgjöldum og að börnin okkar hljóti framúrskarandi menntun og hafi möguleika til að stunda tómstundir. Eldri kynslóðir eiga að njóta öryggis og virðingar fyrir ævistarf sitt. Ríkið á að þjóna fólki, ekki öfugt. Ríkið á að gera fáa hluti en gera þá vel. Og frumkvæði, sköpunarkraftur og atvinnufrelsi eiga að fara saman við sanngjörn tækifæri fyrir alla.

Þessi sýn á rætur í því sem Sjálfstæðisflokkurinn var stofnaður til að standa vörð um. Þegar flokkurinn var stofnaður voru markmiðin sett fram í tveimur stoðum. Annars vegar að vinna í innanlandsmálum með því að vinna að víðsýnni og þjóðlegri umbótastefnu á grundvelli einstaklingsfrelsis og atvinnufrelsis með hagsmuni allra stétta fyrir augum. Hins vegar að Ísland eigi skilyrðislaust að vera sjálfstætt ríki. Þessar tvær stoðir halda samfélagi saman. Frelsi skapar tækifæri og ábyrgð. Sjálfstæði tryggir að við tökum sjálf ákvarðanirnar þegar kemur að hagsmunum okkar og framtíð. Mér finnst mikilvægt að rifja þetta upp. Ekki til að horfa aftur, heldur til að minna okkur á að sterkasta framtíðarsýnin er sú sem stendur á traustum grunni.

Margir biðu spenntir eftir að sjá hvernig ný ríkisstjórn tæki við. Fólk vill trúa því að nýir vendir geti sópað betur en þeir fyrri, að nýtt fólk geti gert betur. En uppgjör ársins er skýrt. Þetta varð fyrst og fremst skattahækkunarár og útgjöld ríkisins jukust hratt. Fjárlögin gera ráð fyrir útgjaldaaukningu upp á 143 milljarða króna á milli ára, á sama tíma og skattar eru hækkaðir um rúmlega 30 milljarða. Hallinn er 28 milljarðar og skuldir aukast um 82 milljarða á næsta ári. Þessu, sem ríkisstjórnin kallar tiltekt, munum við öll finna fyrir.

Þá lofuðu ríkisstjórnarflokkarnir fyrir kosningar að ná niður verðbólgu og vöxtum, en staðan í dag er sú að verðbólgan er nær óbreytt frá því ný ríkisstjórn tók við og vextir hafa ekki lækkað með þeim hætti sem lofað var. Verðbólgan mældist 4,6 prósent í janúar eftir stjórnarmyndun og var 4,5 prósent í desember og nú munu fjárlög og skattahækkanir ríkisstjórnarinnar auka verðbólguþrýsting og draga úr þrótti hagkerfisins. Við þurfum ríkisstjórn sem tekur efnahagsmálin föstum tökum því hagkerfið styrkist ekki með síauknum álögum á heimili og fyrirtæki heldur með því að draga úr þeim. Á sama tíma er atvinnuleysi að aukast og er nú um 6,5 prósent. Fátt er jafn þungbært og atvinnumissir og afkomuóöryggi. Það er ekki nóg að tala um að lækka vexti, það verður líka að grípa til aðgerða og stór hluti þess er að skapa traust.

Seðlabankinn er sjálfstæður og vaxtabreytingar eru hans ákvarðanir. Það sem skiptir heimilin mestu er að hagstjórn styrki traustið og dragi úr verðbólgu en skattahækkanir og útgjaldavöxtur vinna gegn því.

Fyrir atvinnulífið skiptir þetta öllu. Smá og meðalstór fyrirtæki, frumkvöðlar og útflutningsfyrirtæki þurfa fyrirsjáanleika. Þau þurfa einfalt regluverk, stöðugt skattaumhverfi og samstarf við stjórnvöld. Íslenskt velferðarsamfélag stendur og fellur með verðmætasköpun.

Við þurfum skýra valkosti. Við afgreiðslu fjárlaga lögðum við Sjálfstæðismenn einir fram tillögur um verulegt aðhald í ríkisrekstri og lækkun skatta á fólk og fyrirtæki. Lækkun útgjalda um 40 milljarða og lækkun skatta um 30 milljarða. Enginn annar flokkur á þingi lagði fram svo afgerandi tillögur. Ríkisstjórnin hafnaði þeirri leið. Þetta sýnir skýrt hverju þarf að breyta ef við viljum raunverulegan árangur.

Árið 2025 var fyrsta starfsárið mitt sem formaður Sjálfstæðisflokksins. Ég hef fundið fyrir miklum styrk í grasrótinni og frá fólki sem hefur staðið með flokknum í áratugi. Ég hef líka fundið fyrir kröfu um skýrari stefnu. Flokkur sem vill leiða þarf að hlusta vel, vinna vandlega og tala skýrt. Það hefur verið áskorun að taka við Sjálfstæðisflokknum á krefjandi tímum, í breyttu stjórnmálalandslagi og eftir stjórnarsamstarf sem reyndist flokknum að mörgu leyti dýrkeypt. Við þurfum að draga skýran lærdóm af því en um leið á flokkurinn svo sannarlega fullt erindi í stjórnmálunum sem fyrr.

Uppgjör við fortíð felst því ekki síst í því að læra af reynslunni og taka ábyrgð á því sem við gerum næst. Sjálfstæðisstefnan er ekki úr sér gengin heldur er hún skýr leið til betri framtíðar. Hún snýst um að gera fólki kleift að byggja upp líf sitt án þess að vera háð ríkisvaldinu. Hún snýst um að verja sjálfstæði þjóðarinnar í verki og skýra hagsmunagæslu fyrir Ísland. Hún snýst um að standa vörð um réttarríkið, heilbrigt atvinnulíf og samfélag þar sem frelsi og ábyrgð fara saman. Þetta er sú stefna sem getur sameinað fólk á ný, bæði þá sem hafa staðið með okkur lengi og þá sem eru í vafa.

Ég vil að árið 2026 verði ár skýrari stefnu. Við viljum einfaldara skattkerfi, minna bákn og meiri virðingu fyrir atvinnulífinu. Við viljum húsnæðismarkað sem þjónar fjölskyldum með auknu framboði, hraðari uppbyggingu og stöðugleika. Við viljum orku- og innviðauppbyggingu sem byggist á raunhæfri áætlun, skýrum ferlum og samstarfi við atvinnulífið því án orku og innviða stöðvast verðmætasköpun. Við viljum menntakerfi sem metur árangur og styður við metnað þannig að börn fái jöfn tækifæri til að blómstra óháð bakgrunni.

Við viljum öryggi og reglu bæði innanlands sem og á landamærum. Ég er stolt af árangri okkar í útlendingamálum en frá 2022 hefur hælisumsóknum fækkað um 70%. Sú þróun er ekki tilviljun heldur afleiðing markvissra lagabreytinga sem við Sjálfstæðismenn náðum í gegn.

Stefna Sjálfstæðisflokksins í útlendingamálum er og hefur alltaf verið skýr þótt því miður hafi ekki alltaf reynst þingmeirihluti fyrir þeim málum sem lögð hafa verið fram. Þeir sem koma til Íslands til að vinna, leggja sitt af mörkum og taka þátt í þjóðfélaginu eru velkomnir hvaðan sem þeir koma. Þeir sem koma hins vegar til landsins eingöngu til þess að þiggja, til þess að misnota gestrisni okkar eða fara ekki að lögum landsins eru það ekki.

Það er lykilatriði fyrir öryggi þjóðarinnar að útlendingamálin séu í föstum skorðum og að sett séu eðlileg mörk hvað þau varðar. Það er öllum í hag, bæði aðfluttum og þeim sem fyrir eru. Að sama skapi er samstaða innan þjóðfélagsins mikilvægur hluti þjóðaröryggis. Með engu móti getur talist ásættanlegt að alið sé á andúð í garð fólks vegna þess að það sé af erlendu bergi brotið.

Kæru landsmenn!

Áramót minna okkur á að framtíðin er ekki eitthvað sem gerist. Hún er eitthvað sem við sköpum. Ég ætla að leggja alla mína krafta í að Sjálfstæðisflokkurinn verði aftur sá samnefnari sem sameinar fólk um metnað, ábyrgð og vilja til þess að gera Ísland enn betra. Með því að horfa fram, halda fast í gildin og tala skýrt um það sem skiptir heimilin og atvinnulífið mestu.

Fyrir hönd Sjálfstæðisflokksins óska ég landsmönnum öllum árs og friðar og velfarnaðar á komandi ári.

Guðrún Hafsteinsdóttir
formaður Sjálfstæðisflokksins