Allar greinar

"Aukin virkni og þátttaka eldri borgara í samfélaginu ásamt aukinni heilsueflingu, góðu aðgengi að fjölbreyttu vali á hreyfingu og tómstundum er að mati Sjálfstæðisflokksins lykilatriði varðandi vellíðan eldri borgara." Lára Halldóra Eiríksdóttir, grunnskólakennari - skipar 2. sætið á framboðslista Sjálfstæðisflokksins á Akureyri

"Stefna Sjálfstæðisflokksins í komandi sveitarstjórnarkosningum er framsýn og byggir á heildstæðri nálgun sem öll miðar að því að fjölga íbúum og atvinnutækifærum. Þannig er hægt að auka tekjur bæjarins og hraða þeirri uppbyggingu sem víða er kallað eftir. Atkvæði greitt Sjálfstæðisflokknum er atkvæði greitt framförum og festu. Á Akureyri okkar allra skiptir það miklu máli." Heimir Örn Árnason, oddviti framboðslista Sjálfstæðisflokksins á Akureyri

"Sjálfstæðisflokkurinn á Akureyri leggur ríka áherslu á að stoðþjónusta leik- og grunnskóla færist í auknum mæli inn í skólana sjálfa þannig að nemendur fái viðeigandi þjónustu sérfræðinga, s.s. talmeinafræðinga, sálfræðinga og þroskaþjálfa innan veggja skólans. Einnig er mikilvægt að kennarar hafi greiðan aðgang að stuðningi og ráðgjöf hvort heldur sem er kennsluráðgjafa eða annarra fagstétta." Lára Halldóra Eiríksdóttir, grunnskólakennari - skipar 2. sæti á framboðslista Sjálfstæðisflokksins á Akureyri.

"Það hefur verið stórkostlegt að fylgjast með kosningabaráttunni hér á Akureyri, þar sem jákvæðni og bjartsýni hefur einkennt hana. Á stuttum tíma hefur Heimir sett sig inn í málin af miklum áhuga og einlægni fyrir því að sinna sínu starfi vel. Á Akureyri er kominn tími til að Sjálfstæðisflokkurinn leiði meirihlutasamstarf." Berglind Ósk Guðmundsdóttir, alþingismaður Sjálfstæðisflokksins í Norðausturkjördæmi.

"Það er lykilatriði að unga fólkið mæti á kjörstað. Kosningaréttinum má aldrei taka sem sjálfsögðum hlut og okkur ber að nýta hann. Með því að kjósa höfum við bein áhrif á það hvaða fólk tekur sæti í bæjarstjórn og kemur til með að hafa áhrif á nærsamfélagið okkar til næstu ára. Við í Sjálfstæðisflokknum höfum skýra framtíðarsýn og vitum að kominn er tími á breytingar og uppbyggingu." Sólveig María Árnadóttir, verkefnastjóri - skipar 8. sæti á framboðslista Sjálfstæðisflokksins á Akureyri.

"Heildarsýnin er skýr og skynsamleg. Markmiðið er að fjölga íbúum og auka tekjur bæjarsjóðs á sama tíma og stoðþjónusta í skólum bæjarins verður efld, bætt verulega í varðandi málefni eldri borgara og áfram stutt dyggilega við bakið á þeim sem á þurfa að halda. Akureyri er og á að vera áfram samfélag þar sem allir geta fundið sér sinn farveg og nýtt sín tækifæri á sínum forsendum." Þorsteinn Kristjánsson, stjórnmálafræðingur - skipar 11. sæti á framboðslista Sjálfstæðisflokksins á Akureyri.

"Sjálfstæðisflokkurinn mun beita sér fyrir því að sett verði á fót verkefni sem stuðlar að því að eldri einstaklingar geti sinnt athöfnum daglegs lífs, geti unnið eins lengi og hægt er og komi í veg fyrir eða seinki innlögnum á hjúkrunarheimili. Það gerum við með skipulögðu verkefni sem eykur lífsgæði eldri einstaklinga og virka þátttöku þeirra í samfélaginu. Ég hlakka til að eldast á Akureyri ef þessi sýn verður að veruleika á Akureyri okkar allra." Jóna Jónsdóttir, starfsmannastjóri - skipar 7. sæti á framboðslista Sjálfstæðisflokksins á Akureyri.