Að loknum aðalfundi í Málfundafélaginu Sleipni

Aðalfundur Málfundafélagsins Sleipnis var haldinn í Kaupangi á fimmtudagskvöld. Stefán Friðrik Stefánsson var endurkjörinn formaður Sleipnis. Stefán Friðrik hefur setið í stjórn Sleipnis frá árinu 2006, var ritari félagsins 2006-2008, varaformaður 2010-2011 og formaður frá 2011. Stefán Friðrik hefur verið ritstjóri Íslendings frá árinu 2010 og var formaður Varðar, f.u.s. 2003-2006.

Auk Stefáns Friðriks voru kjörnir í aðalstjórn: Edvard van der Linden, Jón Orri Guðjónsson, Jón Oddgeir Guðmundsson og Ragnar Ásmundsson. Í varastjórn voru kjörnir: Karl Ágúst Gunnlaugsson, Baldvin Jónsson og Davíð Þ. Kristjánsson.

Gestur fundarins var Eva Hrund Einarsdóttir, bæjarfulltrúi. Í fundarlok fór Eva Hrund yfir pólitísku stöðuna í bænum, helstu málaflokka og starfið framundan að loknum sveitarstjórnarkosningum á síðasta ári - bæði inn á við og út á við í aðdraganda næstu kosninga 2022. Gagnleg og góð umræða.
 

Nýkjörinni stjórn Sleipnis er óskað til hamingju með kjörið og góðs gengis í félagsstörfum á næsta starfsári.


--------

Skýrsla formanns Sleipnis, fh stjórnar, á aðalfundi 2019


Fundarstjóri – ágætu fundarmenn

Síðasti aðalfundur Sleipnis var haldinn 18. janúar 2018. Þá voru kjörnir í stjórn auk mín: Ragnar Ásmundsson, varaformaður, Jón Orri Guðjónsson, ritari, Edvard van der Linden og Jón Oddgeir Guðmundsson. Í varastjórn voru kjörnir Karl Ágúst Gunnlaugsson, Baldvin Jónsson og Davíð Þ. Kristjánsson. Ég þakka þeim öllum gott samstarf á starfsárinu.

Stjórn félagsins hefur fundað ellefu sinnum á starfsárinu og haldið sjö fundi í sínu nafni á tímabilinu.

Röðun var haldin í fulltrúaráðinu í Brekkuskóla 3. febrúar og kosið í 6 efstu sæti framboðslista flokksins í sveitarstjórnarkosningum. Sleipnir hélt kynningarfund með frambjóðendum 30. janúar þar sem Karl Frímannsson var fundarstjóri.

Aðalfundur fulltrúaráðs var haldinn 15. febrúar og var Ásgeir Blöndal kjörinn formaður í stað Hörpu Halldórsdóttur sem gaf ekki kost á sér til endurkjörs. Á sama fundi voru samþykktar lagabreytingar, tillaga kjörnefndar að framboðslista í sveitarstjórnarkosningum var samþykkt og kosnir landsfundarfulltrúar.

Sleipnir hélt fund 16. febrúar um byggða- og samgöngumál þar sem Njáll Trausti Friðbertsson og Jón Gunnarsson, fyrrum samgönguráðherra, fluttu framsögu og svöruðu fyrirspurnum. 

Aðalfundur kjördæmisráðs var haldinn í Mývatnssveit 3. mars - gestir fundarins voru Áslaug Arna Sigurbjörnsdóttir, ritari Sjálfstæðisflokksins, og Þórdís Kolbrún Reykfjörð Gylfadóttir, iðnaðar- ferðamála- og nýsköpunarráðherra, sem ávörpuðu fundinn auk Kristjáns Þórs Júlíussonar, sjávarútvegs- og landbúnaðarráðherra, og Njáls Trausta Friðbertssonar, alþingismanns. Kristinn Frímann Árnason var endurkjörinn formaður kjördæmisráðs, en hann hefur gegnt formennsku síðan í september 2014. 

Landsfundur Sjálfstæðisflokksins var haldinn í Reykjavík helgina 16. -18. mars. Bjarni Benediktsson, Þórdís Kolbrún og Áslaug Arna voru kjörin í forystusveit flokksins. Þórdís Kolbrún tók við varaformennsku flokksins af Ólöfu Nordal - skarð Ólafar í forystusveit flokksins var vandfyllt en Þórdís hefur staðið sig með miklum sóma.

Vöfflukaffi sjálfstæðisfélaganna var haldið venju samkvæmt á sumardaginn fyrsta. Það markaði í raun upphaf kosningabaráttunnar. Stefnuskrá flokksins var kynnt á súpufundi í apríllok og kosningaskrifstofa opnuð 4. maí.

Í kosningabaráttunni var haldinn fundur með flokksforystunni í Hofi - á Norðurslóðasetrinu hélt Sleipnir fundi með Njáli Trausta um flugvallamál og framtíð ferðaþjónustunnar og Halldóri Blöndal um málefni eldri borgara.

Úrslit kosninganna 26. maí voru mikil og sár vonbrigði - flokkurinn tapaði fylgi og hélt naumlega þriðja manni í stað þess að sækja þann fjórða. Meirihlutinn hélt hér velli í fyrsta skipti í heil 40 ár og hélt samstarfi sínu eðlilega áfram, enda virðist andstaða við Sjálfstæðisflokkinn eina lím hans og haldreipi. Minnihlutaseta þriðja kjörtímabilið í röð er þungur biti að kyngja fyrir félagsstarf okkar, kjörna fulltrúa og grasrótina alla. 

Við verðum að bíta í það súra epli að taka ósigri og læra af honum - stokka upp starfið, laga það sem sligaði okkur og gera betur. Margt hefði betur mátt fara í kosningabaráttunni. Fulltrúaráðið var ekki virkjað með fullnægjandi hætti og eðlilegt að óánægja sé með tapið. Mikilvægt er að gera upp við það með sóma og gagnkvæmri virðingu. Tap er nefnilega hvatning til að stokka upp og læra okkar lexíu eigi okkur að farnast betur 2022 - sú vinna er lykilatriði nú. 

Að loknu sumarleyfi hélt Sleipnir fund á höfuðdegi 29. ágúst, sem líka er afmælisdagur Akureyrarbæjar, þar sem "Fýlupúkafélagið" í þinginu kom saman og tók stöðuna á pólitíkinni við upphaf þingvetrar.

Alþingismennirnir Njáll Trausti Friðbertsson, Óli Björn Kárason, Brynjar Níelsson og Haraldur Benediktsson fluttu framsögu um stöðuna í pólitíkinni og svöruðu fyrirspurnum. Meðal gesta var Jón Gunnarsson sem flutti ágæta tölu um samgöngu- og byggðamálin.

Við í Sleipni héldum svo fund í kjördæmaviku þingmanna 6. október - þar sem rætt var um stöðuna í kjördæminu og pólitísk lykilmál á landsvísu. Þingmenn okkar Kristján Þór landbúnaðar- og sjávarútvegsráðherra og Njáll Trausti fluttu framsögu og svöruðu fyrirspurnum.

Jólagleði sjálfstæðisfélaganna var haldin 7. desember. Daginn eftir, 8. desember, kynnti Njáll Trausti tillögur nefndar undir formennsku sinni um lækkun flugfargjalda með hinni svokölluðu skosku leið og uppbyggingu flugvalla landsins á fundi okkar í Sleipni á Flugsafninu. Þar var í senn gagnleg og góð umræða.

Við hjá Málfundafélaginu Sleipni munum halda okkar striki, halda góða og öfluga málfundi hér eftir sem hingað til. Næsta starfsár er mikilvægt fyrir félagsstarfið allt - til að bæta andann í hópnum, fjölga viðburðum, tryggja virkni allra félaga og þétta raðirnar. Í þeim efnum þarf gott samstarf allra sem vilja efla flokkinn til pólitískra afreka næstu árin.


Stefán Friðrik Stefánsson
formaður Sleipnis