Samstarfssamningur allra framboða í bæjarstjórn Akureyrar



Öll framboð í bæjarstjórn Akureyrar tóku saman höndum 22. september 2020 og tilkynntu um samstarf í bæjarstjórn Akureyrar út kjörtímabilið 2018-2022.

Samstarfssamningur allra framboða

Markmiðið var að mynda breiða samstöðu vegna sérstakra aðstæðna í kjölfar heimsfaraldurs og í rekstri sveitarfélagsins. Ákvarðanir sem teknar verða munu hafa áhrif á reksturinn til langs tíma og töldu kjörnir fulltrúar farsælast að standa saman að þeim verkefnum sem framundan væru.

Önnur ástæða þeirrar ákvörðunar var að traust og virðing væri til staðar á milli allra kjörinna fulltrúa auk þess sem mikill samhljómur væri í grundvallarstefnumálum við núverandi kringumstæður. Samhljómurinn fælist í því að verja viðkvæmustu hópa samfélagsins, setja hagsmuni barna og ungmenna í forgang, blása til sóknar á íbúa- og atvinnumarkaði og stefna að því að rekstur sveitarfélagsins verði sjálfbær innan fimm ára. Áfram verði þó lögð áhersla á gagnrýna umræðu um málefni.

Sú sviðsmynd sem blasti við í rekstri sveitarfélagsins á þeim tímapunkti var einnig áður óþekkt. Að hluta til væri um tímabundið ástand að ræða og kjörnir fulltrúar sammála um að nýta hagstæða skuldastöðu bæjarins og taka lán til framkvæmda. Samhliða lántöku væri óhjákvæmilegt að grípa til hagræðingar til þess að ná sameiginlegu markmiði um sjálfbærni í rekstri.

Lagt er af stað í þessa vegferð í þeirri trú að með þessum hætti geti bæjarfulltrúar best þjónað því hlutverki sem bæjarbúar fólu þeim í síðustu sveitarstjórnarkosningum.

Svæði

Sjálfstæðisflokkurinn á Akureyri  |  Geislagötu 5   |   Ritstjóri Íslendings: Stefán Friðrik Stefánsson  |  XD-AK á facebook  |  XD-NA á facebook